Apeqqarissaarneq: Tapiissutit aatsitassarsiornerlu
Avatangiisinut mingutsitsineq, aalisartunut takornarialerisunullu tapiissutit aamma piniartunut tunitsiviit. Sammisat taakku ilaatigut Jens-Frederik Nielsenimut ullumi apeqqarissaarfigineqarput.
Jens-Frederik Nielsen pingasunngornermi 21. oktober Inatsisartuni siullermeertumik apeqqarissaarfigineqaqqaarami, aatsitassarsiorneq, puisit amii aamma coronap nalaani tapiissutit pillugit apeqquteqarfigineqarpoq.
Coronap inuussutissarsiortunut kingunerluuteqarnera tupaallannanngitsumik initungaatsiarpoq, inuussutissarsiornermut aatsitassanullu naalakkersuisoq, Jens-Frederik Nielsen Inatsisartuni apeqqarissaarfigineqarmat.
Aalisartunut 11 millionit koruunit tungaannut
Hans Enoksenip aalisartut tapiissutinik pissarsinissamut qanoq iliussanersut pillugit iliuusissat ersarluppallaarnerarpai, ersarissaaqqusillunilu. Taamatullu raajanik, saattussanik saarullinnillu aalisartunut tapiissutit qanoq annertutigisunngorlugit immikkoortinneqarsimanersut apeqqutigalugu.
- Aalisartunut tapiissutit 11 milliuunit koruunit tungaannuussasut aalajangerneqarput. Aalisartut tunitsivinnut saaffiginnissapput taperneqarniarunik, Jens-Frederik Nielsen ilisimatitsivoq.
Taassuma oqaatigaa qaleralinniartunut tapiissutissanik maannakkumut pilersaarusiortoqanngitsoq. Raajanik, saattussanik saarullinnillu aalisartut akit apparneruneranut eqqornerlunneqarnerummata, taakku taperneqarsimapput.
Naalakkersuisup Inatsisartuni apeqqarissaartunut ilanngullugu nassuiaatigaa takornarialerinerup iluani tapiissuteqarnissamut tunngatillugu tigussaasunik suli pilersaaruteqartoqanngitsoq. Nappaatip tunillaassortup takornarialerinermut eqquinera malinnaavigineqarpoq, pisariaqassappallu tapiissutinik aaqqiipallannissaq piareersimaffigineqarluni.
Aatsitassarsiorneq pillugu oqallinneq
Mariane Paviasenip paaserusuppaa Kuannersuit ammarneqarnissaanut atatillugu inunnik saliisussanik saliinermilu atortussanik Naalakkersuisut qanoq qulakkeeriniarnersut.
- Ilumoorpoq sillimaniarneq pillugu immikkut ilinniarsimasunik peqannginnatta. Aatsitassarsiorneq aqagu ammassagaluarpat, nangaananga oqaannarsinnaavunga piareersimanngilagut. Ernumassanngilagulli. Inatsit malipparput, sillimaniarneq piareersimaffiginngikkutsigu ammaanavianngilagut, Jens-Frederik Nielsen oqarpoq.
Taassuma ilanngullugu oqaatigaa aatsitassarsiornerup inuussutissarsiutit allat, soorlu savaateqarneq nerisassiornerluunniit, mattunnavianngikkai.
Puisimmi amii
Siumumit Erik Jensenip puisip amiinut tunitsiviit ammatiinnarneqarsinnaasalernissaat ujartorpaa. Illoqarfinni avinngarusimasuni, soorlu Qaanaami Ittoqqortoormiinilu aamma nunaqarfinni puisit amiinik tunisiniarneq ingerlanngilluinnarnerarpaa.
- Sumiiffinni arlalinni tunisisinnaanngillat. Ajornartorsiut aaqqinniarlugu, innuttaasullu imminnut pilersorsinnaanerat qulakkeerniarlugu Naalakkersuisunit qanoq iliortoqartariaqartoq isigaara, Erik Jensen apeqquteqarnermini tunngavilersuivoq.
Jens-Frederik Nielsenip erseqqissarpaa puisit amiinut tunitsivinnik aaqqiisoqarnissaanik suliaqartoqartoq, aammali Great Greenland pisumi akisussaasuusoq.