Apeqqarissaarneq: Qimmit qimuttut, ikiorsiissutit aamma nammineq politikkerisaq
Aalisartut qanoq ikiorneqassappat, qimmit qimuttut piujuartinnissaat Naalakkersuisut qanoq sulissuteqarpat, naalakkersuisorlu nammineq qanoq politikkeqarpa? Jens Immanuelsenimut apeqqutit ilaat taama nipeqarput.
Aalisarnermut, piniarnermut nunalerinermullu Naalakkersuisoq, Jens Immanuelsen, Inatsisartut ukiakkut ataatsimiinneranni Naalakkersuisuni apeqqarissaarfigineqartuni siulliuvoq.
Susassaqarfiisali ilaat pillugu aperisoqanngitsoorpoq. Tassa nunalerineq pillugu akunnerup ataatsip ingerlanerani aperisoqanngitsoormat.
Inatsisartuni ilaasortat paaserusutaasa ilaat tassaapput qaleralinniarfiit aqutsiveqarfinngortinnissaat, aalisarnerup iluani suliniutit nutaat, qimmit qimuttoq pillugu suliniutit aamma Naalakkersuisup aalisarnerup iluani politikkia.
Qimmit piujuartissigit
Doris J. Jensenip paaserusuppaa qimmit qimuttut piujuaannartinnissaat pillugu Naalakkersuisut qanoq suliniuteqarnersut aamma qimmit qimuttut aavarnermi atorneqarsinnaanerat qanoq sulissutigineqarnersoq.
- Qimmit qimuttut ukiukkut aavarnermi assartuutitut atorneqarsinnaapput. Tamanna qimmit qimuttut pillugit nalunaarummi erseqqissumik allaqqareerpoq, piniarnermut Naalakkersuisoq, Jens Immanuelsen akivoq.
- Qimmit qimuttut akusaasimaneranik pasitsaassisoqarnermi qanoq iliortoqassava, Simigaq Heilmann (D) apeqquteqarpoq.
- Qimmit qimuttut akusaanerinik pasitsaassinermi pasitsaassisoq nammineq kommunimut saaffiginnittussaavoq. Pasitsaassisup nammineq akisussaaffigaa saaffiginninnaq, Jens Immanuelsen oqarpoq.
Aalisarnermi ikiorsiissutit
Apeqqarissaarnermi paasinarsivoq aalisartunut ikiorsiissutit suliaralugit naammassilluinnalersut.
- Teknikkikkut suliat, tunisassiorfiit kattuffiillu peqatigalugit suliarineqartut kisimik inissinniarneqartussanngorput. Ikiorsiissutit qanoq ittuunersut ulluni qaninnerni saqqummiunneqassapput, Jens Immanuelsen oqarpoq.
Ikiorsiissutit suliarineqarsimapput augustip aallaqqaataanit, tassa kingumoortumik atuutilertussanngorlugit. Saarullinniartut, raajarniartut saattuarniartullu ikiorserneqassapput. Qaleralinniartunullu ikiorsiissutissatut suliniuteqarnissaq maanna misissorneqartut, Jens Immanuelsen ilisimatitsivoq.
Nammineq politikkerisaq
Apeqqarissaarnerup ilaa Naalakkersuisup aalisarnikkut politikkia pillugu, qaleralittassat aqutsiveqarfeqalernissaat aammalu Naalakkersuisut aalisarnermut politikkiat pillugu apeqqutinut atorneqarpoq.
Hans Enoksen (PN), Erik Jensen (S), Siverth K. Heilmann (A), Aleqa Hammond (NQ) aamma Sofia Geisler (IA) qaleralittassanut aalisarnermut, aqutsiveqarfeqalernissamut MSC-lersuinermullu apeqquteqarput. Aammali inalugallit pillugit suliat politikkerisarlu apeqqutigineqarput.
- Qaleralinniarneq pillugu aqutsiveqarfiit nutaat pillugit nalunaarusiaq januaarip aallaqqaataani 2021-mi atuutilertussatut saqqummiunneqarnissaat naatsorsuutigaara. Killeqanngitsumik aalisarfiit atorunnaarlugit taakku atulissapput, Jens Immanuelsen oqaluttuarpoq, qalerallit aqutsiveqarfii pillugit MSC-lu pillugit aperineqarami taama akivoq.
- Nunatsinni aalisartut pillugit qanoq politikkeqarpit. Nunarput aalisarnermi annertunerpaamik isertitaqarnissaa qanoq anguniarumaviuk, Aleqa Hammond aperivoq.
- Inuiaqatigiit aalisarnermit annertunerpaamik pissarsisinnaasariaqarput, pisuussutinit pissarsisinnaasariaqarput. Taamaattumik qulaajaaneq aallartinneqarsimavoq, tassa aalisakkap qaqinneqartup avammut tunineqartup allamut tunineqarneranit iluanaarutissaa qulaajarneqartussanngorluni, Jens Immanuelsen oqarpoq.
Aleqa Hammondip apeqqutini kingusinnerusukkut erseqqissarpaa:
- Illit suna politikkeraajuk? Inuusuttunut aalisarnermik ingerlataqalersikkumallugit qanoq oqassagaluarpit?
- Inuiaqatigiit aalisarnermit annertunerpaamik pissarsissuteqartariaqarput. Aamma aalisarnermi pisassat pigineqartut pisarineqanngitsoortulli aalisartunut umiatsiaararsortunut nuunneqarsinnaanissaat misissorneqartariaqarpoq. Aalisartut pisassaqarpata, umiatsiaararsortuuppataluunniit assigiimmik atugassaqartariaqarput, Jens Immanuelsen oqarpoq.