Skip to main content

Apeqqarissaarneq: Kommuninut tapiissutit qanoq pissappat?

Aningaasaqarnermut naalakkersuisoq, Vittus Qujaukitsoq (NQ) Inatsisartuni ullumi apeqqarissaarfigineqarpoq. Apeqqarissaarnermi kommuninut tapiissutit initungaatsiarput.

2020-mi aningaasanut inatsisissaq ippassaq aappassaaneerneqarluni oqaluuserineqareerneranit, suli kissassimaartoqartoq, aningaasaqarnermut nunanullu avannarlernut suleqateqarnermut naalakkersuisoq Vittus Qujaukitsoq Inatsisartuni ullumi apeqqarissaarfigineqarpoq.

Naalakkersuisut Siulittaasuat partiit siuttuinit ullumi apeqqarissaarfigineqartussaagaluarpoq, taannali uummammigut suliariteqqammerluni sulinngiffeqarmat, aningaasaqarnermut naalakkersuisoq suliaminut tunngatillugu apeqqarissaarfigineqarpoq.

Apeqqarissaarnermi kommuninut tapiissutit ilaasortanit apeqqutigineqangaatsiarput.

Kommuninut tapiissutit isumaqatiginninniutigineqarnerani kommunit naammagisimaarinninnginnerat pillugu naalakkersuisoq qanoq iliussanersoq, IA-meersup Aqqa Samuelsenip apeqqutigaa.

- Oqarsinnaavunga Naalakkersuisut kommunillu, kommuninut tapiissutit pillugit tunngaviusumik isumaqatigiissummik suli atsiunngillat. Isumaqatigiinniarnerit torersumik ingerlapput. Kommunillu taama nalunaaruteqarnerat paasiuminaatsippara, Vittus Qujaukitsoq akivoq.

Isornartorsiuineq

Kommunit borgmesterii tallimaasut akornanni sisamat aviisimi Sermitsiami kingullermi issuarneqarput, Namminersorlutik Oqartussat aningaasalersuiniarnerminni oqaloqatiginnigatik aningaasaleeriarsimasutut, oqaloqatigiittoqartinnagulu siunnersuummik akuerisassamik nassiussiinnarsimasut. Avannaata Kommuniani borgmesterip borgmestereqatini isumaqatigalugit kingorna nalunaaruteqarpoq.

Apeqqarissaarnermi Vittus Qujaukitsup isornartorsiuineq eqqunngitsuunerarpa.

Taassuma ilisimatitsissutigaa kommuninut tapiissutit ukiut siuliini 1,5 milliardit koruuniusartut, tapiissutillu taama annertutingipajaartutut inissinnissaat naatsorsuutigineqartariaqartoq.

Aningaasanut inatsisissatut siunnersuut ippassaq oqaluuserineqareersorlu, siunnersuutigineqartut tamakkerlutik akuerineqassappata, 70,6 milliuunit koruuninik amigartooruteqarfiussaaq. Aningaasanullu inatsit suliarineqarluni naammassippat, kommuninut tapiissutit annertussusaat aamma sunniuteqangaatsiassaaq.

Akisussaaffeqarnerulerneq

Inatsisartuni ilaasortat maluginiarpaat kommunip Namminersorlutik Oqartussat inissiaataat tigussagaat, innarluutillillu pillugit inatsit januaarip aallaqqaataani 2020-mi kommunini atulertussaasoq.

- Kommuninut tapit annertunerulersinneqarsinnaanerat periarfissaavoq, kommunimi ukiuni tullerni annertunerusumik akisussaaffinnik tigusissaaq, Vittus Qujaukitsoq akissuteqarpoq.

Vittus Qujaukitsup Inatsisartuni ilaasortat ilisimatippai kommunimut isumaqatiginninniarneq qaammatip ingerlanerani naammassissasoq naatsorsuutigalugu, taassumalu kingorna isumaqatigiissutip imaanik ilisimatitsisoqarumaartoq. Erseqqissaatigalugulu kommuninut tapiissutit Inatsisartut iluanni isumaqatiginninniutaanatik, Namminersorlutik Oqartussat kommunillu akornanni isumaqatiginninniutaassasut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER