Anorisaat misiligutitut Sisimiuni innaallagissamik pilersueqataalerpoq
KTI-mi DTU Artekimilu ilinniartut anorisaatinik suliniummi ilinniartinneqarput, KTI-mi ilinniartut aqqusinniortut, DTU-mi ilinniartut siunnersortitut sulinermi allatullu ilisimatusaatigissavaat.
Nukissiorfiit anorisaataa siulleq Sisimiuni anorimut kaavilluni innaallagiamik pilersueqataalereerpoq. Anorisaammik suliniut Nukissiorfiit nukissiuutinik ataavartunik innaallagiamik imermillu pilersuinermi atuinerulernissamik anguniagaqarneranit 2017-imilu saqqummiunneqartumit aallaaveqarpoq, naalakkersuisummi tamatuminnga novemberimi ukioq kingulleq saqqummiussaqarput, Sermitsiaq allappoq.
Anguniagassat suliniutit 35-it tassani allaaserineqarput, nukissamik tamanut pilersuineq 2030-imi sapinngisamik annertunerpaartaa nukissiamik ataavartumik tunngaveqartumik pissarsiarineqarsinnaanissaanik tunngaveqarluni.
Ilinniartitsineq
Anorisaatit marluusunit siulleq maanna kaavilluni innaallagiamik pilersuilereersoq Sisimiuni KTI (Kalaallit Nunaanni Teknikkimik Ilinniarfik) nunaminertaatani napparneqarpoq. 25 meterinik portussuseqarluni 25 KW-mik sarfaliorsinnaalluni, naatsorsuutigineqarporlu anorisaat ataaseq ukiumut 80-140 MWh sarfaliortassasoq.
Nukissiorfiit anorisaatit pillugit suliniuteqalerneq aallarnerlugu oqariartuutiginikuuaat, anorisaatinik nappaaneq aallartippat KTI Sisimiunit ikiorneqarumaaramik, anorisaatinik sanaartorneq ingerlatsinerlupillugit ilinniartunut ilinniartitsissuteqassangamik.
- ARTEK suli suliniummut ilanngutivinngilaq. Kisianni naatsorsuutigaarput suliniuteqarfigissagaat paasissutissanik anorisaatinit pilersinneqartunik katersivigalugu, DTU ARTEK- imi (Issittumi Teknikkikkut Ilinniarfik) AC-i, Teit Groth.
Allaaserineqartoq tamakkiisumik Sermitsiami atuaruk. Aviisi uani pisiarianerineqarsinnaavoq: