Anorisaat ajorteqqittoq
Anorisaat Sisimiuni inissinneqarsimasoq aappassaat ajorteqqippoq. Anorisaatip suluusaa ataaseq maanna qupisimavoq.
Nukissiorfiit Sisimiuni misilittaaffiani anorisaat ajorteqqippoq. Anorisaatip suluusaa maanna qupisimavoq.
Nukissiorfiit nittartakkaminni taama allapput.
Anorisaat taanna aappassaat ajortippoq. Siullermik siorna januaarimi ajortippoq, suluusaa katakkami.
- Soorunami tamanna pisoq assorsuaq uggoraarput tassami kinaluunniit eqqarsanngilaq anorisaat taanna aamma ajortittooqqissasoq. Tamatumunngali iliutigitillugu immitsinnut saammarsarpugut anorisaat Sisimiuni misilittaaffitsinni napparsimagatsigut, Claus Andersen-Aagaard, pisortaanerugallartoq oqarpoq.
Anorisaatit 25 miiterisut portussuseqartut nukissiamik ataavartumik pissarsiffigineqarsinnaasunut allanut ilaallutik, Kalaallit Nunaanni nunaqarfinni nukissiamik nioqqutissiornermut minguinnerusumik nioqqutissioriaatsimut allanngortitsinermut ilaassapput. Misilittaaneq Nukissiorfiit siunissamut iliuusissatut pilersaarutaanut ilaavoq, tassa sumiiffinni tamani 2030-mi sapinngisamik nukissiamik ataavartumik atuinissaq anguniarneqarmat.
Suluusat aasaq taarserneqartut
Anorisaatit suluusaat pingasut juulimi taarserneqarput, sananeqarsimanerinilu pitsanngorsaasoqarpoq ajortittoortoqaqqinnissaq pinaveersaarniarlugu. Tamannali ilutsissimanngilaq.
Claus Andersen-Aagaard tusagassiutinut nalunaarummi ilisimatitsivoq ajortittoornermi inunnik ajoqusertoqarsimanngitsoq, ajortittoornerullu kingunerisaanik illoqarfimmut pilersuineq innarlerneqarsimanngitsoq.
- Anorisaatinik misilittakkavut pitsaanngitsut soorunami pilersaarusiornitta ingerlaqqinnerani nalilersuinitsinnut ilaassapput, tassa nunatsinnik qanoq nukissiamik ataavartumik pilersuinissarput eqqarsaatigalugu, Claus Andersen-Aagaard oqarpoq.
Nukissiorfiit nittartakkaminni ilisimatitsipput anorisaatip aappaa misilittaavimmiittoq, Viking Windimit suliarineqarsimasoq, pissusissamisut ingerlasoq. Tassunga misilittakkat pilersaarusiornermut aamma ilanngunneqassapput.
Suliniut KTI Sisimiut suleqatigalugu ingerlanneqarpoq, atuarfimmilu ilinniartunik atuartitsinermut atatillugu anorisaatinik ingerlatsineq atorniarpaat.