Skip to main content

Anori: Nunamini nunanilu allani iluatsitsilluartoq

Kalaallit Nunaanni illoqarfinni 13-ini taperserserluarneqarluni pingasunillu nunanit allanit akissarsitinneqarsimalluni ’Anori’ pilersaarutaasimasumit iluatsilluarnerungaatsiarsimavoq. Ilitsersuisartorlu Pipaluk K. Jørgensen filimiliassami tullia sulissutigilereersimavaa

Septembarip qaammataani Nuummi takuteqqaarneraniit Kalaallit Nunaanni illoqarfinni allani aqqaneq-marlunni ’Anori’ takutinneqarsimavoq. Sumiiffinnilu tamaginni tigulluarneqarsimasoq, filmimi ilitsersuisoq Pipaluk Kreutzmann Jørgensen oqaluttuarpoq.

- Tigulluarneqarsimanera tulluusimaarutigilluinnarlugulu nuannaarutigeqaarput, taanna Sermitsiaq.AG-mut oqarpoq.

Isiginnaariat amerlasimapput filmimullu qisuariaatit pitsaallutik.

- Arlallit oqaluttuarisarpaat, illoqarfimminni filmiliamik takutitsisoqarnera qujamasuutigalugu. Assersuutigalugu Upernavimmi ukiuni kingullerni qulini kalaallit filmiliaannik marloriaannarluni takutitsisoqarsimavoq, Pipaluk Kreutzmann Jørgensen oqarpoq.

Takutinneqarnerata kingorna apeqquterpassuit

Arlallillu aappariinnermi nakuusertarneq apeqqutigisimavaat, naak tamanna filmimi toqqaannartumik ilaanngikkaluartoq.

- Uannut uisitsisutut issimavoq. Tamakkuninnga oqaluuserisaqarnissaq annertuumik pisariaqartinneqarpasippoq.

Taassuma tusarsimavaa eqimattat 14-iniit 16-it tikillugit ukiullit filmimi atorneqarsimasut pillugit oqalliserinnittut. Ilaatigut arlariinnik oqaluttuaanera pillugu.

- Inuusuttut taakku eqqarsallaqqeqaat.

Nunani tamalaani akissarsitinneqarnera

Filmi Kalaallit Nunaanniinnaq maluginiarneqarsimanngilaq. Maannamummi pingasunik akissarsitinneqarsimalereerpoq. Torontomi imagineNative-festivallimi Pipaluk K. Jørgensen 'emerging director' akissarsiaraa, DeMoinesimi Interrobang-festivallimi filmiliani pitsaanerpaatut kiisalu Hollwood Film Festivalimi 'silver screen' akissarsitinneqarsimavoq.

- Akissarsiat pissarsiat uanga kisima pinnanga Kalaallit Nunaatali pissarsiarisimagai isumaqarpunga.

Tamannalu pissutigalugu filmi nunarsuup sinnerani takutinneqassaaq. Taanna ukiup tulliani ilaatigut USAmi, New Zealandimi soorunami aamma Danmarkimi takutinneqassaaq.

- Immikkuullarissumillu aamma pisoqassaaq, kisianni massakkut oqaatigerusunngilara, Pipaluk Kreutzmann Jørgensen oqarpoq.

Filminik amerlanerusunik neriuuteqartoq

Taassuma neriuutigaa, iluatsitsilluarsimaneq pissutigalugu kalaallit filmiliaat amerlanerit takutinneqartalissasut.

- Siullertut pingaaruteqarpoq, nammineq oqaluttuaatitsinnik oqaluttuartarnissarput. Soorunami aamma nunani allamiorpalaaraangat nuannequtigiinnartarpaa.

Pipaluk Kreutzmann Jørgensenili filmiliassami tullia sulissutigilereersimavaa.

- Maanna sukkanermik suliarineqassaaq, filmiliami isumassarsiarineraniit naammassinissaanut ukiut arfineq-pingasut ingerlasimanerat eqqaallugu taanna oqarpoq.

- Filmiliamik iluatsilluartumik sanasinnaanerput takutereerlugu neriutigaara tapersersorneqarnissaq ajornannginnerulaalissasoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER