'Anori' Danmarkimi takuteqqaarneqalerpoq
Pipaluk Kreutzmann Jørgensenip filmiliaa nuannarineqarluartoq Københavnimi takutinneqalerpoq.
Filmiliaq nuannaarineqarluartoq 'Anori' Københavnimi takutinneqartussanngorpoq.
'Anori' Nuummi takutinneqaqqaarami, kingornalu sinerissami angallanneqarluni takutinneqaqattaarami, isiginnaartunit nuannarineqarluarsimavoq. Nunat tamalaat akornanni nersorneqarlunilu akissarsitinneqareerpoq.
Isiginnaartartullu Københavnimi eqqaanilu najugaqartut filmiliamik, Pipaluk Kreutzmann Jørgensenimit ilitsersorneqartumik aamma isiginnaarnissaminnut periarfissaqalerput. 'Anori' Danmarkimi Grand Teaterimi februaarip pingajuani takuteqqaarneqalerpat, ilitsersuisoq isiginnaartitsisullu peqataassapput.
Filmi Anori (Nukâka Coster Waldau) pillugu oqaluttuarpoq. Anori New Yorkimut angalavoq, angutaataa Inuk (Angunnguaq Larsen) ajutooreernermi kingorna siniinnalersimasoq ornillugu. Inuup ikinngutaa Malik (Ujarneq Fleischer) oqaluttuami aamma pingaaruteqarluinnarpoq.