Anorersuartoqarnissaanik aarlerisaarineq: Sisamanngornermi silaaannakkut angallassinerit tamarmik unitsinneqarput
Nuna tamakkiusarlugu aqagu sisamanngornermi anorersuassasoq aarlerisaarutigineqarpoq. Silaannakkut angallanneq sisamanngornermi qanoq issanersoq pillugu Air Greenland ataatsimiinnermini aalajangerpoq. Timmisartuussinerit tamarmik unitsinneqarput.
Aqagu sisamanngornermi nuna tamakkiusarlugu anorersuarnissaanik aarlerisaaruteqartoqarmat, Nunatsinnilu silaannakkut angallassisoqassanngilaq.
Air Greenland anorersuarnissaanut sillimmartaarpoq, timmisartuussinerillu tamaasa unitsissallugit aalajangerluni. Air Greenland taama tusagassiutinut nalunaaruteqarpoq.
- Kalaallit Nunaata kitaata annersaani Tunumilu anorip silallu pissusiata Air Greenlandip timmisartuutiminik qulimiguuliutiminillu
angalatitsisinnaaneranut naliusut sinnerneqartussaapput , nalunaarput.
Angalasussat ullunut allanut nuunneqarput
Tamanna isumaqarpoq nunap iluani nunanullu allanut sisamanngornermi novemberip 14-ani silaannakkut angallasinissaagaluit, ullormut allamut nuunneqartariaqalernerannik. Air Greenland ilisimatitsivoq timmisussaagaluit angalanissaat piaarnerpaamik nuunneqassasut.
- Sineriak tamakkerlugu silaannaap sakkortuumik unerisimannginneranik kinguneqartumik silarluttussaavoq, taamaattumillu timmisartuussinissagut tamaasa kinguartittariaqarpagut. Ilaasussatta sulisuttalu isumannaassusaat qulakkeerniarlugu taamatut aalajangiivugut, Air Greenlandimi Timmisartuusinermut immikkoortortaqarfimmi pisortaq, Niels Chemnitz Frederiksen oqarpoq .
Illoqarfiit tamarmik pineqarput
Illoqarfiit sumiiffiillu ilaat anorersuassanngikkaluarput. Illoqarfiilli ilaasa anorersuarujussuarnerannit, angallannerit tamarmik eqqorneqartussanngorput.
- Illoqarfiit ilaanni ilaasussat sumiiffimminni silagikkaluartoq aallarnissamik taamaatinneqarneranik misigisaqassapput. Kisiannili timmisartoq ornitamut ataatsimut timmisartuussissappat, isumannaallisaaneq eqqarsaatigalugu angallavimmi timmisartorfigisamini mittarfimmut allamut missinnaasussaavoq.
- Angallavitsinni mittarfiit ataqatigiit pitsaasuupput,
nalinginnaasumik angallavitsinnut qulakkeerisartut. Kisiannili
aqagu sineriak sinerlugu silarlungaatsiartussaavoq, taamaattumillu
angallavitsinni mittarfinnik allanik, timmisartunit
miffigineqarsinnaasunik qulakkeerinissatsinnut soqanngilaq.
Angalasussat nutaamik angalaffissamik piffissamik tunineqarnissaat sulissutigineqarpoq, angalasussallu toqqaannartumik nalunaarfigineqassallutik. Angalasussat Air Greenlandip nittartagaanik malinnaaqquneqarput.