Anorersuartoqarnerani Qasigiannguani misissuisoqassanngitsoq
Qasigiannguani ullumi arfininngornermi 4. december anorersuartoqarnera pissutigalugu innuttaasut aninissaat kaammattuutigineqanngilaq. Qasigiannguani ullumi misissuinissaraluit anorersuarunnaarnissaanut kinguartinneqarput.
Qasigiannguani innuttaasut ullumi arfininngornermi 4. december coronavirusimut misissortinnissaminnik ilisimatinneqarsimasut suli utaqqilaartariaqarput.
Qasigiannguanimi anorersuartoqarnera pissutigalugu misissuinerit kinguartinneqartariaqalersut Nunatta Nakorsaaneqarfiata ilisimatitsissutigaa.
- Qasigiannguani ullumi 4. december sakkortuumik anorersuarnera pissutigalugu innuttaasut aninissaat kaammattuutigineqanngilaq. Tamanna pissutigalugu katersortarfimmi Covid-19-imut misissuinissat anorersuarunnaarpaat aatsaat aallarteqqinneqassapput, nunatta nakorsaaneqarfia naatsumik ilisimatitsivoq.
Atuartut tamarmik misissortissapput
Qasigiannguani tunillatsissimasut 53-it sapaatip akunnerata ingerlanerani paasineqarput. Peqqinnissaqarfiup tunillatsissimasinnaasut maanna misissorpai, oqartussallu aalajangerput misissuisussat amerlanerusut illoqarfimmut tikisinneqassasut.
Region Diskop pilersaarutaa naapertorlugu Juunarsip Atuarfiani atuartut tamarmik, meeraaqqerivimmiittartut tamarmik, atuareernerup kingorna ornittakkami sulisut suliffeqarfinnilu allani sulisut misissortittussaapput.
Pilersaarulli maanna kinguartinneqarallarpoq.