Anorersuarnera pissutigalugu timmisartuussisoqanngilaq
Nuummi anorersuarnera pissutaalluni timmisartumik angalasussaagaluit 100-t sinneqartut aallanngitsoorput. Air Greenland timmisartumik attartorpoq, arfininngorpat immikkut angallassinissamut.
Nuummi ullumi sisamanngornermi aqagulu tallimanngornermi anorersuassaaq.
Anorip sakkortussusaanik uuttuinerit kingulliit, asiaq.gl-imi takuneqarsinnaasut takutippaat nal. 10.00 sakkortunerpaaneq anoraasuarnermi 31,7 m/s uuttorneqarsimasoq.
Anorersuarnerup kinguneranik silaannakkut angallanneq eqqorneqarpoq.
Air Greenland ilisimatitsivoq Nuummiit Kangerlussuarmiillu angalasussat 110-t missaanniittut kinguaattoornermit eqqorneqartut. Danmarkimut ingerlaqqittussat aamma ullumi aallanngitsuussapput.
- Nuummut Nuummiillu angalanissat tamarmik kinguaattuunngikkunik taamaatiinnarput. Nuummiit Danmarkimut ullumi angalasussat aamma aallanngitsuussapput. Angalasut eqqorneqartut maannamut 110-upput, Air Greenlandimi attaveqatigiinnermik ataqatigiissaarisoq, Ujammiugaq Engell Sermitsiaq.AG-mut ilisimatitsivoq.
Timmisartoq attartugaq arfininngormat angallassissaaq
Air Greenland Niceairip timmisartuutaanik arfininngorpamut attartorpoq, Danmarkimut angalasussat arfininngorpat angalasinnaalertillugit.
Air Greenlandip angalasut kinguaattoornermit eqqorneqartut nutaamik angalaffissaannik piffissalissallugit sulissuteqarpoq. Ualimullu anoraarutiiminissaa neriuutigineqarpoq, unnugu timmisartoqaqqilernissaa neriuutigineqarluni.
Danmarks Meteoroligiske Institut, dmi.dk naapertorlugu Nuummi anori tallimanngornermi ualikkut sakkukinnerulissaaq.