Anorersuarmit umiatsiaararsortut eqqorneqarujussuartut
Novemberip qiteqqunnerani anorersuarujussuarmat umiatsiaararsortut amerlasuut umiatsiaminnik piniutiminnillu annaasaqarput. Taarsiiffigineqarnissamik suliat arlallit maanna suliarineqarput.
Aalisarnermik inuussutissarsiuteqarnerup imaannaanngitsuunera 15. november assortorneqarsinnaanngitsumik uppernarsarneqarpoq. Ulloq taanna Kalaallit Nunaanni aalisartut ullorsiornerat eqqorlugu anorersuaq ulussaartuartut sakkortutigisumik anoraasuartarluni, malissuarnillu aatsaat taama portutigisunik malitseqarluni sumiiffinni assigiinngitsuni pitaruppoq.
Aviisi Sermitsiaq taama allappoq.
Ulloq taanna aalisartut nalliuttorsiorfittut atugassaraluartik avannaani umiatsiaatillit amerlasuut umiatsiaminnik piniutiminnillu annaassiniarfittut atorpaat, ajoraluartimillu ilaat annertuumik annaasaqarlutik.
Umiatsiat arlallit kivipput, piniuterpassuillu malissuarnit amuneqarput, aalisartut ilaat inuussutissarsiorsinnaajunnaarallarput.
Taarsiiffigineqarnissamillu suliat amerlasuut maanna suliarineqartut, Aalisarnermut Piniarnermut Nunalerinermullu Pisortaqarfimmiit oqaatigineqarpoq.
Ilimanaq eqqugaarujussuartoq
Ullormi aalisartut piniartullu akornanni puigorallagassaanngitsumi, malissuit siornatigut taamak angitigisut Ilimanami takuneqarsimanngisaannaartut, umiatsiaararsortunut annertuumik annaasaqaataaginnaratik, aammali talittarfimmi aseruatiteruatitserujussuartitsipput.
Eqqugaasullu ilai aalisarnermik piniarnermillu inuussutissarsiuteqartut, Fritz Johansen erneralu Ove Johansen, aalisarnermut atortorpassuatik, soorlu qassutit qaleralinniutit, saarullinniutit, ammassannut ungusissutit nutaat, nipisanut qassutit, ningittagarpassuit aalisarnermullu atortut allat malissuarnit saavigunneqarmata, tamarluinnaasa annaavaat.
Taassuma saniatigut nunaqqataasut umiatsiaat marluk poca 505-it, nunap qaaniittut malissuarnit amuneqarput.
– Annaasagut nalitoorujussuupput, taakkuli sillimmateqartinnagit umiatsiagut kisiisa sillimmateqartippagut. Taarsiivigineqarnissamut suliamik ingerlatsivugut, neriuppugullu aallarniutissannguatsinnik taperneqalaassalluta, Fritz Johansen aviisimut Sermitsiamut oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: