Anorersuaq: Bussit angallannerat unitsinneqarpoq, meeqqallu angerlarsimatinneqarnissaannut angajoqqaat kaammattorneqarput
Anorersuarnerani pingasunngornermi ullaakkut bussit uninngapput.
Kitaata ilaani pingasunngornermi ullaakkut anorersuarpoq, taamaattumillu Nuup Bussii, Nuummi bussinik ingerlatsisut nalunaaruteqarput, bussinik ingerlatsineq tamarmi unitsinneqartoq.
Bussinik ingerlatseqatigiiffik pingasunngornermi ullaap tungaani nalunaaqutaq 10 missaani nutaamik nalunaaruteqarniarpoq.
Kommuneqarfik Sermersooq aamma anorersuarneranut atatillugu nalunaaruteqarpoq.
Kommunip nittartakkamini angajoqqaat meeqqaminnik angerlarsimatitsinissaat pingasunngornermi kaammattuutigaa.
Periarfissaappat meeqqat angerlarsimatinneqarlik
- Aqagu pingasunngornermi 19. januaarimi Nuummi sekundimut 40 meterit tikillugit anoraasuartartumik anorersuarnissaanik DMI aarlerisaarivoq. Taamaattumik Kommuneqarfik Sermersooq Nuummi angajoqqaanut, meeqqaminnik atuarfinniit paaqqinnittarfinniillu angerlarsimatitsisinnaasunut angerlarsimatitsiinnaaqqusilluni kaammattuivoq, kommuni allappoq.
Atuarfiit meeqqeriviillu tamarmik ammassasut, kommunip nalunaarutigaa. Angajoqqaat suliartortariaqartut, meeqqatik suli paaritissinnaassavaat.
- Pingasunngornermi atuarfiit sapinngisamik online-kkut atuartitsinissamik aaqqissuussissapput, tamatumunngaluunniit taarsiullugu meeqqat angerlarsimaffimminni atuakkerisassaannik nassartitsissallutik, kommuni taama nalunaaruteqarpoq.
Bussit biilillu ingerlaqqinnaveertut
Pingasunngornermi ullaakkut Kalaallit Nunaanni Politiit ilisimatitsipput, biilit arlallit bussilu Nuup Qinngorpullu akornanni aqqusinermi unnuap qeqqata missaani ingerlaqqinnaveersimasut. Aputajaatitsisoqarpoq, tamatumalu kingorna aqqusinermi angallattut ingerlaqqissinnaalerput.
Tamatuma saniatigut politiit nalunaarfigineqarput, Qinngorpumi sanaartorfiit kaanngarlutik uppissimasut. Inunnik ajoqusertoqanngilaq, suliffeqarfillu sumiiffimmi sanaartortoq nalunaarfigineqareerpoq. Pigaartut pisortaat Malik Olesen oqaluttuarpoq.
Kalaallit Nunaanni Politiit sapaatip-akunnerata aallartinnerani anorersuarnissaa aarlerisaarutigereerpaa, innuttaasullu pigisaminnik anorersuarnissaanut isumannaareqquneqarlutik. Suliffeqarfiit aamma sanaartorfinni isumannaallisaanerup qulakkeernissaanut kaammattorneqarnikuupput.
Nuup Paamiullu akornanni anori sakkortooq
DMI-p Aasiaat kujataanut silassamik ilimasaarutaani anorlissangatinneqarpoq. Nuup Paamiullu akornanni sakkortunerpaassalluni:
- Kalaallit Nunaata sinnerani qulisimassaaq nittaallertarluni, imaliliortarluni imaluunniit siallertarluni. Sisaminik issilluni pingasunillu kiattarluni, Sisimiuni nillernerpaassalluni. Natsimanermik anorsuannguuttartumik kujasimmit kippasimmillu anoraasuartassaaq anorersuartut anoraasuarsuartullu sakkortutigisumik. Nuup Paamiullu akornanni anoraa sakkortunerpaassangatinneqarpoq. Ullup naalernerani anori sakkukilliartulaalissaaq, DMI allappoq.
Air Greenlandip nittartagaa naapertorlugu Nuummit aallarnissaraluit taamaatinneqarput. Timmisartut marluk aallartussat aamma tikittussat marluk pineqarput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...