Anorersuaq qatsorpoq - iluarsaasoqassaaq
Marlunngornermi anorersuaq Nuummi angallannermi ajornartorsiortitsivoq, politiillu innuttaasut aninissaannut aarlerisaaruteqarput. Anorersuarnerata nalaani inunnik ajoqusertoqarsimannginneranik politiit qujanartumik ilisimatitsissutissaqanngillat, kisianni sanaartornermi atortunik aamma sanaartornermi ikorfat uppissimasut iluarsaanneqartariaqassapput.
Marlunngornermi unnukkut illoqarfiit pingaarnersaanni anorersuarpoq. Ilaatigut biilertut arlallit Qinngorput aqqutaani marrissimapput, politiillu piffissap ilaani innuttaasut aninnginnissaannik kaammattuipput, anorersuarmit tingitaasunit eqqorneqariataarsinnaanerat pissutigalugu.
Nalunaaqutaq 21 missaani kaammattuutertik atorunnaarsippaat, mianersorlunilu anisoqarsinnaasoq nalunaarutigalugu.
Anorersuarnerata nalaani politiit inunnik ajoqusertoqarsimaneranik nalunaarfigineqarsimanngitsut, pigaartut pisortaata Søren Bendtsenip pingasunngornermi ullaakkut Sermitsiaq.AG-mut oqaluttuaraa, kisianni angallannermi ajornartorsiortitsisimasoq, kiisalu sumiiffiit ilaanni pingasunngornermi iluarsaassisoqartariaqartoq oqaatigaa.
Ikorfat sanaartornermilu atortut tingikkai
- Anorersuaq unnuup ingerlanerani qujanartumik sakkukilliartorpoq. Aputaajaasut aputaajaapput, unnuakkut nalunaaqutaq marlunulli aallarput, Søren Bendtsen oqarpoq.
Pigaartut pisortaata oqarnera naapertorlugu Qinngorpumi pingaartumik malugineqarpoq:
- Anorersuup sukujuit aalajangerneqarsimanngitsut, ikorfat aamma sanaartornermi atortut naammaginartumik qularnaarneqarsimanngitsut tingippai. Qaliat ilaanni aamma aserortoqarpoq.
- Ullumikkut iluarsaasoqalaartussaassaaq, Søren Bendtsen oqarpoq, anorersuarneranut atatillugu Nuup avataani ajornartorsiortoqarneranik taanna nalunaarfigineqarsimanngilaq.
Qamuteralaat atorneqartut
Nuummi aqqusinermi ajornartorsiornerit Nuussuarmit Qinngorpumut aqqusinermi pingaartumik pisimapput, tassani politiit qatserisartut peqatigalugit qamuteralannik innuttaasunik biiliminnit ingerlariaqqissinnaanngitsunik aallertariaqarsimapput.
DMI-p silamut ilimasaarutaani 'toqqorsivik' naapertorlugu Nuummi marlunngornermi nal. 18 missaani anori 30,1 m/sek.-nik sukkassuseqarpoq, anoraasuarnera 42,6 m/sek sukkassuseqarluni.
