Anoraasuarujussuartaarnerani umiarsuaq takornariartaat tulannaveertoq
Italiamiut takornariartaatitut umiarsuaat "Aidacara" anoraasuarujussuartaqattaarnera pissutigalugu Nuummut tulanneq ajulerpoq, takornariallu illoqarfiit pingaarnersaannut niunissaminnut qattorsiiginnartariaqarput.
Umiarsuaq takornariartaat 1.200 ilaasoqarsinnaasoq Nuummut pilersaarutit malillugit ullaaq manna nalunaaqutaq 8.00 tulattussaagaluarpoq, Qinngorpulli kangerluani akunnialunni maanna utaqqimaareerpoq.
Talittarfiup allaffiani atorfilik Johan Lennert Sermitsiaq.AG-mut ilisimatitsivoq, kujasimmik anorlernera tulanniarnermut ajornartorsiortitsisoq.
- Talittarfik kujammut sammisuuvoq. Kujataaniillu taama sakkortutigisumik anorlertillugu umiarsuit taama angitigisut anorimullu taama sunnertiatigisut aqukkuminaassinnaasarput, Johan Lennert ilisimatitsivoq.
Ataasiarluni siornatigut taamaattoqareersoq
Umiarsuit takornariartaatit ukioq manna tikerarneranni ataasiaannarluni siornatigut taama pisoqareerpoq. Umiarsuaq takornariartaat pilersaarutit malillugit Nuummiittussaagaluartoq augustimi tulanngitsoorpoq.
- Umiarsuup kaptajniata tulassinnaalerniassagamik anorikilliiminissaa utaqqimaarpaa, talittarfimmi ikiorti ilisimatitsivoq.
Umiarsuaq Islandimi Akureyrimiit ingerlaarpoq, nunattalu imartaani nalunaaqutaq 16:00 angalaqqilissalluni.
Paasissutissat kingulliit – nalunaaqutaq 13.16: Umiarsuup kaptajniata akunnerpassuarni utaqqisimagaluariarluni talittarfiup tullianut angalaqqinnissani aalajangiinnarpaa. Nuuk taamaasilluni takornarianit tikinneqanngitsoorpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...