ukiaanerani ataatsimiinneq

Annikitsumik atukkiinerit aallarnisaasuaqqanut tapersiissutaassapput

Naalakkersuisut aningaasanik 20.000 koruunit 100.000 koruunillu akornanni aallarnisaasuaqqat atorniarfigisinnaasaannik immikkoortitsiniartut

Aallarnisaasuaqqat ikiorserneqassapput. Taamaammat Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoq Hans Enoksen (PN) aningaasanik annikitsunik atorniarfigineqarsinnaasumik aningaasanik immikkoortitsisoqarnissaanik siunnersuuteqarpoq.

Inatsisartut ukioq kingulleq ukiaanerani ataatsimiinneranni ukiuni sisamanik misileraalluni aningaasanik 20.000 koruuniniit 100.000 koruunit tikillugit atorniarfigineqarsinnaasumik Naalakkersuisut pilersitseqqullugit suliakkerpaat.

Aallarnisaasut aningaaserivinnit atukkerneqarsinnaanngitsut aningaasanik atukkerneqartassapput. Taamaammat aningaasanik atukkiisinnaaneq oqilisaaffigineqassaaq.

- Aaqqissuussinerup siunertaraa aallarnisaasartunut mikisunut aningaasalersuisinnaanerup oqinnerulersinnissaa, piumasaqartoqassanngilarlu taarsigassarsiarititanut qularnaveeqqusiissutissanik. Taarsigassarsititsisarnerup siunertaa aamma malunnartinneqassaaq akiliisinnaassutsip nalilerneqarnerani taarsigassarsiarititassanik qinnuteqarnermut atatillugu, Hans Enoksen (PAN) siunnersuutigisaminut tunngavilersuilluni allappoq.

Kommuneqarfiit aningaasanik atukkiinermi aningaasaliissuteqarsinnaanerat siunnersuummi ilanngunneqarpoq.

Siunnersuut Inatsisartut ukiaanerani ataatsimiinneranni ulloq 3. oktober siullermeerneqassaaq.

Powered by Labrador CMS