Annikitsumik aatsitassarsiornermut akuersissutaatilik ingerlalluartoq
Annikitsumik aatsitassarsiornermut akuersissutinik piginnittunut piumasaqaatit sakkukillisinneqarsimapput periarfissallu annertusineqarsimallutik, taamaalilluni misiliinissaqpilerinarnerulersinneqarluni.
Annikitsumik aatsitassarsiornermut akuersissummik pissarsiniarneq ajornanngikannerpoq. Aatsitassanut Aqutsisoqarfimmi tamatumani suliaqarnissamut sapiissuseqartut suli amerlanerit pissarsiarineqarnissaat soqutigineqartorujussuuvoq. Taamaattumik annikitsumik aatsitassarsiornermut akuersissutaatilinnut nutaanut siunnersuinermik ilitsersuinermillu ikiuukkusussinnaapput.
Annikitsumik aatsitassarsiornermut inatsisip ataani ujaqqanik
piiaalereersimasut ilaat tassaapput ilaqutariit Jepsenikkut. Angúnguak Thomas Jepsenip angutini qatanngutinilu arnaq peqatigalugit suliffeqarfik Greenland Minerals & Gems pilersissimavaa, taakkualu maannamut ukiuni arlalinni akuersissutaateqarsimapput.
Rubinit safirillu eqqannguatsinni
Angùnguak nammineq ujarassiuutut ilinniagaqarsimavoq qanittukkullu ilinniakkaminik inaarsaalluni ukiuni marlunni Australiameereersimalluni angerlamut uterluni. Taassuma ujaqqat krystalillu Kalaallit Nunaanni nassaassaasut ukiorpaalussuarni alutorisimavai, taamaattumik ilinniakkani peqqissaarullugu toqqarsimallugu.
Ujarassiooq Eric Drummond, aallakaatitassiani nangeqattaartuni Ice Cold Goldimi peqataasimasoq, peqatigalugu Nuummit umiatsiamik
akunnerup ataatsip missaannaani ornittarialimmik rubininik safirinillu kusanartunik nassaarsimavoq.
Maanna Australiamit angerlareersimalerami nassaat taakkua
iluaqutiginiarneqartussanngorput.
Isumaliutit
Nassaanut atatillugu eqqarsaatit amerlasuujusimapput, Angúnguarlu annikitsumik aatsitassarsiornermut akuersissummik piginnittutut inissisimaffimminnik qanoq ilillutik pitsaanerpaamik iluaqutiginnissinnaanerminnik suliaqangaatsiarsimavoq.
Eric Drummondimik suleqateqarnerup kinguneranik rubinit angisuut ilaat nunat tamalaat akornanni saqqummersitsinerni arlalinni nittarsaanneqarsinnaalereersimapput, taamaalillutillu pisinissamut
ilimanaatillit rubininik inuit nunaanneersunik asseqanngitsunik tappiffiginnilersimallutik.
Angúnguak maannakkorpiaq allanik suliaqarpoq, kisianni annikitsumik aatsitassarsiornermik inuussutissarsiutip siunissami ungasinnerusumik tamakkiisumik inuussutissarsiutigilernissaanik
anguniagaqarpoq.
Takornariaqarneq piiaanerlu
Siunissami ungasinnerusumik anguniagaq tassaavoq ilaatigut takornarianik nammineq rubiniutissaminnik assersuutigalugu assammiumut katissutissamut atugassamik nassaarniarusuttunik pilerilersitsisinnaanissaq, ilaatigullu rubininik safirinillu piiaanissaq
silisisarnissarlu, pinnersaasiortartunut assigisaannullu tunineqarsinnaasunik.
Angúnguak ilaqutaalu rubininik arlalinnik piiaasimapput, taakkualu namminneerlutik silillugit, qillarissarlugit suliaralugillu, qanoq periarfissaqartiginerat takusinnaajumallugu.
Rubinit saqqumiinnartumiinngillat, pinngortitamili toqqorsimalluarlutik, nassaarisinnaassaagannilu ilisimasaqarluarfigineqartariaqarlutik.
Annikitsumik aatsitassarsiornermut akuersissutit
Maannakkorpiaq annikitsumik aatsitassarsiornermut akuersissutit atuuttut 57-iupput, kisianni Aatsitassanut Aqutsisoqarfik sumiiffinnik arlalissuarnik annikitsumik aatsitassarsiornermut
akuersissutinik qinnuteqarfigineqarsinnaasunik nunap assinganut inissitsiteriffiusumik qulaajaasimavoq. Sumiiffinni taakkunani aqutsisoqarfik piareersaataasumik suliaqareersimavoq,
ilisimallugulu, nassaarniarfiginissaannut periarfissaqarluartoq.
Akuersissutit assigiinngitsut marluk pissarsiarineqarsinnaapput. Ataaseq sumiiffimmut kisermaassisussaatitaaffiusoq, ataaserlu piiaaffiusinnaasoq sumiiffimmullu kisermaassisussaatitaaffiunngitsoq.
Akuersissummik qinnuteqarsinnaassagaanni minnerpaamik ukiuni tallimani nunami najugaqarsimasariaqarpoq. Aatsitassanut aqutsisoqarfiup nittartagaani akuersissutit assigiinngitsut marluk pillugit paasissutissanik pissarsisoqarsinnaavoq, nalornissuteqaraannilu aqutsisoqarfimmut attaveqartoqarsinnaalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...