Annertunerusumik atoqqiisalernissaq kommunimit anguniarneqarpoq
Avannaata Kommuniani, atoqqiinerusarnissaq taamaalillunilu eqqakkanik ikullaasarnerup annikinnerulernissaa sulissutigineqassasoq kissaatigineqarpoq.
- Kissaatigaarput ataatsimut eqqakkanik ajornartorsiuteqarnerup ataasimut aaqqiivigineqarnissaa. Nuna tamakkerlugu tamanna ajornartorsiutaavoq, ataatsimut paasinninnermik kiisalu suleqatigiinnermik pisariaqartitsisoq.
Avannaata Kommuniani borgmesteri Palle Jerimiassen kommunip nittartagaanut oqarpoq.
Borgmester Palle Jerimiassen-ip maluginiarsimavaa, Avannaata Kommuniata eqqakkanik passussisarnerup ajornartorsiutaanerata ataatsimut aaqqiiviginiarneqarnissaa peqataaffigerusunngikkaa, tamannalu paasiuminaatsippaa.
Atueqqinnissaq
- Inuiaqatigiinnut aningaasat isaatinneqartartut maanngaanniik annertupput; aalisarnermit, takornariaqarnermit sanaartornermiillu, aammalu tamatta ataatsimut karsitsinnut tamatta akileeqataasarpugut, kisiannili misigisimanarpoq killormut pissarsisinneqarneq ajorluta. Taamaammat Kommunalbestyrelse isumaqarpoq tamanna oqimaaqatigiissumik ingerlanerunngitsoq, Palle Jerimiassen oqarpoq.
Nuummi Sisimiunilu ikuallaavissat, kiisalu ooliakumik ikullaaveeqqat pingasut sanaartorneqarnerannut aningaasartuutissat naatsersuutigineqarpoq 400 millioner koruunit missaanniissasut. Aningaasartuutissat taakku, kommuninit eqqakkanik passusisarnermi suliffeqarfimmik ESANI A/S-imik piginneqataasunit avinneqartussaapput. Tamatumalu saniatigut Avannaata kommunia illoqarfinni sisamani kiisalu nunaqarfinni 23-ni eqqakkanik passusisarnermi atortorissaarutinut atorneqartussanik sanaartornermi atugassanik immikkut aningaasartuuteqartussaassaaq, tamannalu naatsersuutigineqarpoq 125 mio. koruuninik naleqassasoq.
Avannaata Kommuniani isumaqartoqarpoq, pisariaqartoq ungasinnerusoq eqqarsaatigalugu eqqarsartoqartariaqarneranik, ikuallaaviit pitsaanerusut qulakkeernissaat kisiat aaqqiissutissatut isiginiaannarnagu. Atoqqiinermik kiisalu atortukunik allatut atoqqiisarnermik kingunilimmik aaqqiissutissarsiortoqassasoq kissaatigineqarpoq, ikuallaaginnartarneq inissiigallartarnerlu kisiisa aaqqiissutissatut isiginagit. Tamanna Naalakkersuisut eqqakkat passunneqartarnerat pillugu pilersaarutaata 2020-2031-p anguniagaanut ataqatigiimmat, tassanimi mingutitsinngitsumik piujuartitsinerlu aallaavigalugit ineriartortitsineq qitiuvoq.
- Nunarsuup sinnerani sapinngisamik plastikkimik atueqqittarnissaq sulissutigineqarpoq, taamaammat plastikkimik ikuallaaginnartarnerput pissusissamisuunngilaq. Plastikkimik atoqqiisarneq atortussiat eqqarsaatigalugit pisussataagaluarpoq annertooq aammalu kallerup inneranik pilersuinermi sipaarutissaq annertoorujuugaluarpoq plastikki atoqqinneqartartuugaluarpat, tamatigut plastikkiliortuaannarnermut naleqqiullugu, Palle Jerimiassen oqarpoq.
Pilersaarutit
Piffissami matumani Ilulissani eqqaavissuaq pillugu nutaamik pilersaarusiornissaq sulissutigineqartoq kommuni allappoq.
Maannamit eqqakkat annertunerusumik immikkoortiterneqartarnissaat siunertarineqarluni, atoqqinneqarsinnaasut atoqqinneqartarnissaat ajornannginnerulersikkumallugu, aammalu taamaalilluni ikuallaasarnerup annikinnerulernissaa sapinngisamik pisinnaanngorlugu. Ungasinnerusoq eqqarsaatigalugu plastikkit, savimerngit, pappilissat atoqqinneqartalernissaat, kiisalu arrortinneqarsinnaasut arrortinneqarsinnaanngitsullu immikkoortiterneqarsinnaalernissaat anguniagaavoq.