Annaassiniartoqarsimasoq: 71-inik ukiulik ikiortissarsiorsimasoq

Angut 71-inik ukiulik nakorsamit ikiorserneqapallannissamik pisariaqartitsisimavoq.

Kalaallit Nunaanni Politiit sapaammi unnukkut Kujataani angummit ajornartorsiortumit saaffigineqarsimapput. Angutip timaata affaa nukillaarsimavoq ikiorserneqarnissamillu pisariaqartitsisimalluni.

Pigaartut pisortaata Bent Johnsenip oqaluttuaraa, angutip kinaanini sumiinninilu oqaluttuarisinnaasimagaa. Angullu Qaqortup kitaani illuaqqamiittoq paasinarsisimalluni:

- Politiit angallataat politiimik peqqinnissaqarfimmilu sulisumik ilaasoqartillugu aallartinneqarsimavoq, Bent Johnsen oqarpoq.

Politiit nalunaaqutaq 19.57 ajornartorsiortoqarneranik nalunaarfigineqarsimapput. Nalunaaquttap 23.20-p missaani politiit angallataat uterluni tikippoq, 71-inillu ukiulik Qaqortumi napparsimmavimmut apuunneqarlunilu misissorneqarluni.

Angut ataasinngornerup ullaavani napparsimmavimmi suli uninngatinneqarpoq.

Powered by Labrador CMS