Annaassiniarnermik Nuup eqqaani sungiusartoqartoq
Politiit, Issittumi Sakkutooqarfik qatserisartullu ulluni kingullerni Nuup eqqaani sungiusarput. Sungiusarnerlu suli ingerlavoq.
Umiatsiaq ikuallattoq inuillu imaani nilleqisumi ajornartorsiortut, Kalaallit Nunaanni Politiit, Issittumi Sakkutooqarfiup qatserisartullu ulluni kingullerni Nuup eqqaani annaassiniarnermik sungiusarnerminni sammisivimavaat.
Sungiusarnermut taakku ilaapput, sungiusartoqarnerani ilaatigut oqartussat illoqarfiup pingaarnersaanniit arleriarlutik silaannakkut angallanneqartarsimapput. Sungiusarnerlu sisamanngornermi nanginneqassasoq, Kalaallit Nunaanni Politiit pigaartuisa pisortaat Bent Johnsen Sermitsiaq.AG-mut oqaluttuarpoq.
- Imaani assiginngitsunik pisuusaartitsivugut, suleqatigiinnerpullu qanoq ingerlanersoq tamatumani misissortarlutigu, Bent Johnsen sungiusarneq pillugu oqarpoq.
Ingerlatsineq naammaginarpa
Pingasunngornermi sungiusarnermi inuit umiatsiamit ikuallattumit annaanniarneqarput, marlunngornermilu inuit ajornartorsiortut - imaanit toqqaannartumik, aammali umiatsiamit ingerlaartumit uninngasumillu qulimiguulimmut amoorummik qaqittarlugit sungiusartoqarluni.
Sisamanngornermi suna sungiusarneqarniarnersoq peqataasunit maannamut suli ilisimaneqanngilaq, Bent Johnsen sisamanngornerup ullaavani oqaluttuarpoq.
Ulluni allani sungiusarnerit ajunngitsumik ingerlasimasut, pigaartut pisortaat oqarpoq.