Anna W: Pisortat aamma sumiginnaasarput

Tasiilami imigassamik nioqquteqarneq aamma sassaallersinnaaneq 17. september tungaanut matuneqarallarpoq.

Matusigallarneq Naalakkersuisunit aalajangerneqarpoq kommunalbestyrelsep saaffiginninnerata kingorna.

Anna Wangenheim Tasiilami pissutsit pillugit sapaatit akunnerni kingullerni malinnaasimavoq. Augustip naanerani septemberillu aallartinnerani imigassartortoqarsimatillugu pisut sakkortuut arlallit Tasiilami pipput, politiit peqqinnissaqarfillu artukkerneqangaatsiarlutik.

Demokraatit isumaginninneq peqqinnissarlu pillugit oqaaseqartartuat, Anna Wangenheim, suliniutit pioreersut Naalakkersuisunit ilisimatitsissutigineqannginnerat isornartorsiorpaa.

Naalakkersuisunut isornartorsiuut

Anna Wangeheim videoliamini peqqissutsimut Naalakkersuisup, Kirsten L. Fenckerip Naalakkersuisut Tasiilaq pillugu utaqqimaarnissaannik oqariartuuteqarnera, isornartorsiorpaa. Tassani Naalakkersuisoq nassuiaavoq innuttaasut saaffinnippata piareersimajumaarlutik.

- Qinigaasimagaanni, naalakkersuisunilu issiagaanni inoqatit inuiaqatigiillu illersornissaannut sukannersumik pisussaaffeqartussaavoq. Allatut iliornerit suulluunniit pisortanit sumiginnaanerupput, Facebookimini Anna Wangenheim allappoq.

Ikiuutit pioreersut atorsigit

Anna Wangenheimip erseqqissarpaa isumaginninnerup iluani ajornartorsiutit pillugit aaqqiissutissanik siunertaqartumik ikiuutit pioreersut Naalakkersuisup saqqummiussinnaagaluaraat. Anna Wangenheimip ilaatigut taavai Allorfik, Alliaq aamma Tusaannga, innuttaasunik ikiuussinnaallutillu katsorsaasinnaasut.

- Inatsisartuni ilaasortatut innuttaasut eqqaasikkusuppakka ikiortissat pioreersut periarfissammata. Allorfimmut, Alliamut aamma Tusaanngamut saaffiginnissinnaavutit ikiorneqarusukkuit, oqarpoq.

Video uani takusinnaavat: