Anna Wangenheim: Coronap ingalassimatinniarnera iluatsippoq, kisianni...

Coronavirusip Kalaallit Nunaanni tunillaassuutilinnginnissaannut suliniutit peqqissutsimut Naalakkersuisup, Anna Wangenheimip iluatsittutut taavai. Sulili nalorninartoqarsinnaavoq.

Kalaallit Nunaata coronavirusip tunillaassuutilinnginnissaanut suliniutai, Peqqissutsimut Naalakkersuisup, Anna Wangenheimip (D), iluatsilluartutut nalilerpai.

- Isumaqarpunga iluatsilluarsimagami nunatsinni tuniluunneq suli takusimanngikkipput, Peqqissutsimut Naalakkersuisoq, Anna Wangenheim, Sermitsiaq.AG-mit apersorneqarnermini oqarpoq.

Taamaattoq Kalaallit Nunaanni suli qulakkeerivittoqarsinnaanngilaq. Nunanit allanit angalasut 1.000-it sinneqartut nunatsinnut sapaatit akunneri tamaasa tikittarput. Taakkunanngalu ikittuinnaat tikereernerminnit coronavirusimut misissortittarmata, naalakkersuisup ernumanartoqartippaa.

Oqartussat innersuussutaat

  • Assaat eqqiluisaartinneqassapput
  • Kakkissarfimmut talinnulluunniit tangajorit quersorlutilluunniit
  • Qitserarnaveersaarit
  • Assamminnerit, ulussakkut kuninnerit pakkunnerillu pinaveersaakkit - timikkut allap attornissaa killeqartiguk
  • Eqqiluisaarneq silaannarissartarnerlu eqqumaffigikkit
  • Napparsimanermut ersiuteqaruit angerlarsimaannarit
  • Allanut qanillinaveersaarit

Paasisat: Nakorsaaneqarfik

- Nunatsinni nakkutilliineq sukaterparput, ilumut tunillaassortoqannginnera qulakkeerumallugu. Nunani allani, pingaartumi Danmarkimi tunillaassortoqapallappoq, taamaammat qulakkeerinnittariaqarpugut, Anna Wangenheim oqarpoq.

Danmarkimi ulloq unnuarlu ataatsip ingerlanerani tunillatsissimasut paasineqartut 251-t nutaat nalunaarsorneqarsimapput, tunillatsissimasullu qaammatini kingullerni tallimani aatsaat taama amerlatigalutik. Nunatsinni tunillatsissimasunik nalunaarsorsimasoqanngilaq.

Sukannernerisumik nakkutilliineq

Namminersorlutik Oqartussat iluani sulisut pingasut Coronap allattoqarfianut nuunneqarsimapput, nunap iluani sulianut nakkutilliinerup annertusarneqarnissaa anguniarlugu.

- Ineriartorneq qanimut malinnaaffigaarput. Maannamulli oqaatigisariaqarpoq Coronavirusimut periusissiatta malinnissaa tatigilluinnaratsigu, peqqissutsimut Naalakkersuisoq nassuiaavoq.

Nunatsinni COVID-19-ip tunillaassunnginnera pissutigalugu killilersuinerit innersuussutillu attatiinnarneqarnerat innuttaasunit paasiuminaassinnaasoq Anna Wangenheimip paasisinnaalluarpaa.

Kalaallit Nunaannili tassanngaannartumik sakkortuumillu tunillaassortoqalinnginnissaa piniarlugu, innersuussutit innuttaasunit malinneqaannarnissaat pingaaruteqartoq, aamma erseqqissarpaa.

- Allatut iliorsinnaanngilagut kisianni oqaatigeqqillugu innuttaasut oqartussat innersuussutaannik malinneqqullugit. Nunatsinnut tikittut aamma tikinniariartut eqitaarnaveersaarsigit allanullu qanillinaveersaarlusi, oqarpoq.

- Suna tamarmi piffissaqarpoq. Nunani allani coronavirus tunillaassortorujussuuvoq. Taamaammat inuiaqatigiinni akisussaaffimmik aamma tigusisariaqartugut isumaqarpunga, coronamullu periusissiaq maleqqullugu, erseqqissaavoq.

Kalaallit Nunaanni coronavirusimik tunillatsissimasut katillutik 14-iupput, tamarmillu peqqissereerlutik. Tunillatsissimasoq kingulleq 23. juli paasineqarpoq. Kalaallit Nunaanni coronavirusimut 7.183-eriarluni misissuisoqareerpoq.

Powered by Labrador CMS