Anna Wangenheim qaffasissumik inissisimaffeqalersoq
Demokraatit arfininngornermi nuna tamakkerlugu ataatsimeersuarmata politikkikkut siulittaasup tulliatut qinigaavoq.
Demokraatit arfinginngornermi nuna tamakkerlugu ataatsimeersuarput, tassani Jens-Frederik Nielsen partiimi ullumikkut Inatsisartuni illuatungiliuttuusumi siulittaasutut qinigaaqqippoq.
- Tatigineqarnera nuannaarutigaara, maniguullunga suliat oqimaattut siunnerfittullu aalajangiussimasavut ingerlateqqissavakka
- Sunniuteqarniarnissaq isumaqaraanga sunniuteqarniartarpugut, taamatullu ingerlanerput ingerlatiinnassavara, Jens-Frederik Nielsen Sermitsiaq.AG-mut oqarpoq.
Siulersuisut
Siulittaasoq: Jens-Frederik Nielsen
Politikkikkut siulittaasup tullia: Anna Wangenheim
Ingerlatsinermi siulittaasup tullia: Nivi Olsen
Aningaaserisoq: Malene Vahl Rasmussen
Ilaasortaq: Steen Lynge
Ilaasortaq: Rachel Ingemann
Ilaasortaq: Lena Ravn Davidsen
Nuna tamakkerlugu ataatsimeersuarnermi partiip siuttuini malunnaatilimmik aamma allannguisoqarpoq, tassani Anna Wangenheim politikkikkut siulittaasup tulliatut qinigaagami qaffasissumik inissisimaffeqalerpoq.
Taassuma Steen Lynge politikkikkut siulittaasup tulliatut taarserpaa. Jens-Frederik Nielsen naapertorlugu, Steen Lyngep nammineq Anna Wangeheim politikkikkut siulittaasup tullissaatut innersuussimavaa.
Anna Wangenheim peqqissutsimut naalakkersuisutut siusinnerusukkut atuuffeqarsimavoq, Demokraatit Kim Kielsenip siorna Inatsisartunut qinersisoqarnissaata tungaanut naalakkersuisuutitaanut ilaammata.
Naapeqatiginninniartarniartut
Siulittaasup Jens-Frederik Nielsenip oqaatigaa, partiimit aaqqissuusseqqinnissat arlallit Inatsisartuni oqaluuserineqartussat, ilaatigut ilinniartitaanermut, akileraartarnermut nunanullu allanut politikkimut tunngassuteqartut sammineqassasut.
Partii illuatungiliuttuuvoq, suliamiilli suliamut sunniuteqarniartarniartoq, siulittaasup oqaatigaa:
- Nunanut allanut politikkissaq pillugu isumaqatiginninniarnernut siullernut peqataareerpugut. Siunnersuuteqarsimavugut, maannalu isumaqatiginninniarnerit tigussaanerusumik ingerlanneqassapput, neriuutigaarpullu sunniuteqarumaarluta.
- Suliamut peqataaniarluta sunniuteqarniarlutalu naapeqatiginninniartassaagut. Politikki tassa taamaappoq, Jens-Frederik Nielsen oqarpoq.