Anna W. peqqissaasutut namminersortutut aallartisartoq

Inatsisartuni ilaasortaq isumaqarpoq nammineerluni innuttaasunut annertunerusumik iliuuseqarsinnaalluni, politikkimik suliaqarnerup saniatigut. Maanna alloriarpoq, peqqinnissap pitsaaliuinerullu iluani namminersortunngorluni.

Anna Wangenheim, Demokraatit sinnerlugit Inatsisartuni ilaasortaasoq, peqqinnissaq pinaveersaartitsinerlu pillugit namminersortutut aallartisarpoq.

Peqqissaasutut ilinniakkani atorlugu namminersortutut ingerlalernissaanut alloriarneq siulliuvoq, nunatsinnilu peqqinnissaqarfiup iluani neqeroorutigineqartartunut tunngatillugu aaqqissuussaanermut unammillernerulluni.

- Assersuutigalugu kigutilerisunik aamma pillorissaasunik namminersortunik peqareerpugut. Aamma peqqissaasunik namminersortunik peqarsinnaavugut. Siunnersortitut namminersortutut aallartippunga peqqinnissaqarfik pillugu aaqqissuussaaneq unammillerniarlugu, Anna Wangenheim Sermitsiaq.AG-mut oqaluttuarpoq.

Siunnersorteqarfik Qimuttoq napparsimasunik piartortunik ilaqutaanillu siunnersuisassaaq, napparsimareersimasunillu pillorissartussanik aamma siunnersuisassalluni. Kiisalu inooriaaseq peqqutigalugu napparsimalersimasunik, inooriaasissamik nutaamik siunnersuisartussaalluni.

- Napparsimasut piartortullu ilaqutaallu siunnersorneqartarnissaat pisariaqartinneqartoq takusinnaavara. Ilaqutariit ingerlariaqqinnissaannut ilisimasakka aallaavigalugit ikiuunnissamut neqerooruteqartassaanga, oqaluttuarpoq.

Nappaatit inooriaatsimut tunngasut nalinginnaanerulersut

- Inooriaaseq peqqutigalugu nappaateqalerneq pillugu paasinnittaatsit annertunerulernissaa pisariaqarsoraara, aammalu nappaatip inooqatigilernissaanut aqqutissiuussineq pisariaqarsorinarluni, siunnersuisinnaanermut periarfissat pillugit oqarpoq.

Anna Wangenheim Inatsisartuni ilaqutariinnermut peqqissutsimullu ataatsimiititaliami maanna ilaasortaavoq, peqqissutsimullu naalakkersuisuunikuulluni. Politikkikkut sulinermini peqqinnissaq pillugu annertunerusumik suliaqareerpoq. Namminerli nassuerutigaa peqqinnissaq pillugu politikkikkut sinaakkusersuinerit aaqqissuusseqqinnerillu sivisusinnaasut. Namminerli suliffeqarfiliornikkut annertunerusumik, piaarnerusumillu unammillertumik iliuuseqarsinnaalluni.

Aaqqissuussaanerup allanngortinnissaa sivisusinnaasoq

- Ilumoorpoq politikeritut annertuumik iliuuseqarsinnaareerpunga aaqqissuussaanerup allanngortinnissaanut. Taamaattoqassappalli Inatsisartuni amerlanerussuteqarneq angoqqaartariaqassavara. Nassuerutigissavara utaqqisinnaassuseqannginnama, oqarpoq nangillunilu:

- Peqqinnissaqarfiup iluani pisortat neqeroorutaat kisiisa isumalluutiginiarutsigit, innuttaasut peqqinnerulernissaannut periarfissat killeqassapput. Pisortanit neqeroorutigineqartartut unammillerusukkakkit, iliuuseqarsinnaasorigamalu namminersortutut aallartisarpunga, oqarpoq.

Innuttaasunut tunngasunik neqerooruteqarnerup saniatigut suliffeqarfiit iluani peqqinnarnerusumik avatangiiseqarnissamut siunnersortitut aamma neqerooruteqartassaaq.

Powered by Labrador CMS