Anna aamma Steen: Inatsisartuni suliinnassapput
Qinigaasimasut Naalakkersuisunngoraangamik Inatsisartunit sulinngiffeqarnissamik qinnuteqartarnerat ileqquulersimagaluartoq malinnagu, demokraatit sinnerlugit Anna Wangenheim aamma Steen Lynge Inatsisartuni suliinnassapput.
Anna Wangenheim, peqqissutsimut naalakkersuisunngortoq, aamma Steen Lynge, nunanut allanut tunngasunut aamma nukissiuuteqarnermut naalakkersuisunngortoq, Inatsisartuni ilaasortaanerminnit sulinngiffeqarnissamik qinnuteqassanngillat.
Taamaasillutik assersuutigalugu Naalakkersuisut inatsisissatut siunnersuutaannut taaseqataasarnissaminnut periarfissaq tigummiinnassavaat.
Demokraatit siulittaasorigallagaata, Nivi Olsenip Sermitsiaq.AG-mut tamanna uppernarsarpaa.
- Suna tamarmi sukkasoorujussuarmik pivoq, isumaqatiginninniarnerit naalakkersuisunngortitsinerlu sukkasuumik ingerlapput, aalajangerpugullu taakku (Anna Wangenheim aamma Steen Lynge, aaqq.) Inatsisartunit sulinngiffeqarnissamik qinnuteqassanngitsut, Nivi Olsen Sermitsiaq.AG-mut oqarpoq.
Oqaloqatigiissutigineqaqqissaaq
Taassuma erseqqissarpaa sinniisunik isertitsinissaq partiip iluminni oqaloqatigiissutigisimagaat.
- Qinigaasimasut naalakkersuisunngoraangata ileqquulersimavoq Inatsisartunit sulinngiffeqartarnerat. Sooq ilissi taamaaliunngilisi massakkut?
- Piffissaq apeqqutaasimavoq. Sinniisunik inissiinissaq isumatusaarnerusimanngilaq, Inatsisartut ataatsimiinnerat nalinginnaasumit sivikinnerusoq naalluinnalersimammat. Sinniisoqalernissarli pillugu tunuliaqutarisakka piffissami tulliuttumi oqaloqatigeqqissavakka, Nivi Olsen erseqqissaavoq.
- Sinniisussat tulliuttut Demokraatini suli ilaasortaanersut uppernarsarsinnaaviuk?
- Oqarsinnaavunga ilisimallugu ataaseq suli Demokraatiummat. Aappaali ilaasortarineripput suli qulakkeersinnaanngilara, taanna assigiinngitsunik oqariartortarsimammat, partiip siulittaasorigallagaa nassuiaavoq.
Sinniisoqarneq nammineernerluunniit
Inatsisartunut qinersinermi 2018-imi Demokraatit arfinilinnik ilaasortaatitaqalerput. Partiimi taaneqarnerpaat ilaat marluk, Randi Vestergaard Evaldsen aamma Niels Thomsen politikkimit univissimapput, Anna Wangenheim aamma Simigaq Heilmann Inatsisartuni sinniisutut isersimallutik.
Sinniisussatut tullernguuttut tassaapput Bo Martinsen, Inatsisartunut qinersinermi 2018-imi 51-init taajuunneqartoq, aamma Rachel H. Ingemann, 36-init taajuunneqartoq.
- Soorunami sinniisoqarnissaq pillugu piffissami tullermi oqaloqatigiittoqassaaq, atussanerigut. Periarfissaasimavoq Naalakkersuisuutilluni Inatsisartuni sulinngiffeqarnissaq atornagu, maannakkumullu periarfissaq taanna atorpaat, Nivi Olsen erseqqissaavoq.
Oqaatigisinnaanngilaali Inatsisartut ukiamut ataatsimiilerpata Demokraatit naalakkersuisuutitaat marluk Inatsisartuni sulinngiffeqarnissamut qinnuteqassanersut.
Inatsisartut suleriaasianni allassimavoq Inatsisartunut ilaasortat Naalakkersuisunngornerminni Inatsisartunit sulinngiffeqarnissamik qinnuteqarsinnaaneq periarfissarigaat. Periarfissaavoq, piumasaqaataanani.
Naalakkersuisuunerminni Anna Wangenheim aamma Steen Lynge Inatsisartuni ataatsimiititaliani ilaasortaasinnaanngillat. Inatsisartunili taasisitsisoqarneranni suli taasisinnaatitaallutik.