Anitsisartoq Etna innermik anitsisoq
Sicilienimi Etna innermik anitsilersimavoq, arfininngornerullu unnuaani arsakut qullarsimapput anngamillu annertunngitsumik aniasoqarsimalluni.
Sicilienimi arfininngornerup unnuaani innermik anitsisartoq Etna innermik anitsilersimavoq, taama Italiami vulkanologit ilisimatitsipput.
Arsakut qullaassat annertuut peqqutaallutik Cataniap eqqaani mittarfiit marluk matusariaqarsimapput, Italimi illoqarfiit annersaasa tulleraat mittarfimmik matusisariaqarsimasoq. Mittarfiilli taakku marluk arfininngornermi ullaakkut ilaannakoortumik ammaqqipput.
Arsakut qullaassat saniatigut anitsisartumiit anngaq kissartoq aniasimavoq. Qaqqamilu ammut kilometerimik ataatsimik affarmillu kuussimavoq.
Ajoqusertoqarsimaneranik aseruatitertoqarsimaneranillu nalunaartoqanngilaq.
Etna juunip aallartinnerani arlaleriaq ”uummaarissumik qanngorpallareerluni” siornalu decembarimi aniatitsereerluni Etna innermik aniatitsilerpoq, Italiens Nationale Institut for Geofysik og Vulkanologi (INGV) taama ilisimatitsivoq.
Etna minnerusunik innermik anitsillattaasarpoq. Innermik anitsinera annertooq kingulleq 2009-p aallartinnerani pivoq.
Italiap qeqertaani Strombolimi Sicilienip avannaatungaaniittumi qaammatip aallartilaarnerani innermik anitsisoqarmat pisulluni angalaartup ataatsip inuunini annaavaa.