Anita Hoffer: Tunngaviusumik inatsimmut taamaammat suleqataarusuppunga
Suleqatigiissitsisut Anita Hoffer Tunngaviusumik inatsisissaq pillugu isumalioqatigiissitamut ilaasortassatut innersuuppaat, naak taanna partiimut ilaasortaanngikkaluartoq. Taasuma piginnaasai aalajangiisuusut, Tillie Martinussen ilisimatitsivoq.
Inatsisartuni partiit tamarmik Tunngaviusumik inatsisissaq pillugu isumalioqatigiissitamut ilaasortassanik marlunnik innersuussaqartussaapput. Ataaseq ilaasortanngussaaq, aappaa sinniisuussalluni. Naalakkersuisut agguataarneqarnerannik aalajangiisuussapput, taamaalilluni angutit arnallu amerlaqatigiissammata.
Anita Hoffer innersuunneqartunut ilaavoq, taannalu Tunngaviusumik inatsisissaq pillugu isumalioqatigiisitamut ilaasortaalissaguni, sulinissamut qilanaarpoq.
Suliassaq soqutiginartoq
_ Suliassaq soqutiginartorujussuuvoq, taannalu maniguuffigisorujussuuara, Anita Hoffer, Naalakkersuisunit toqqarneqarsinnaanini pillugu Sermitsiaq.AG-mut taama nassuiaavoq.
- Suleqatigiissitsisut attaveqarfigigaminnga, inatsisilerituutut ilinniarsimaninnit piginnaasakkat isumalioqatigiissitami atornissaannut soqutiginnillutik nassuiaapput, Anita Hoffer ilisimatitsivoq, taanna ulluinnarni inissiaatileqatigiiffimmi atorfilinnut pisortaavoq, sunngiffimmilu sulinermi Transparency International Greenlandimi sulisarluni.
Nalinginnaasuunngitsoq
- Taamaalilluni politikkikkut isummanik aalajangersimasunik ingerlatitseqqinnissannut tunnganngilaq. Suliareqquneqartup soqutiginartorujussuunera qularnanngilaq aamma nalinginnaasuunngilluinnarpoq, Anita Hoffer maniguuttoq taama oqarpoq, taanna ukiuni 14-ini Kalaallit Nunaanni najugaqarsimavoq.
