Skip to main content

Aningaaseriviup umiatsiaararsorlutik aalisartunut aningaasaliinini tamaasa unitsippai

Grønlandsbank umiatsiaararsortunut aningaasanik atorniartitsisarnini allatigulluunniit aningaasaliinini tamaasa unitsissallugit aalajangersimavoq. Aalajangernermut tunngavilersuutigineqarpoq umiatsiaasarsorlutik aalisartut ukiuni kingullerni amerleriarujussuarsimammata, aalisarnerli aningaasatigut piujuaannartitsinissarlu siunertaralugu imminut nammassinnaajunnaavissimammat.

Kalaallit Nunaanni aningaaserivinni annerpaaq annertuumik alloriarniarluni aalajangerpoq, aalajangernerlu sinerissap qanittuani, pingaartumik umiatsiaararsorluni aalisartut akornanni, annilaartitsingaatsiartussaassaaq.

Aningaaserivimmi pisortaq Martin Kviesgaard, Grønlandsbanken, Sermitsiaq.AG-mut ilisimatitsivoq aningaaserivik aningaasaliinissaminut ukiuni kingullerni tunuarsimaareersimasoq, maannali aalajangertariaqalersimasoq nutaanut aningaasaliinerit atortunilluunniit taarsiinissamut aningaasaliinerit tamaasa unitsittariaqarlugit. Aningaaseriviup aalisarnerup piujuaannartitsinermik tunngaveqanngitsumik aqunneqarneranut mianersoqqusisareersimavoq, maannali taama aalajangertariaqalersimalluni.

Tunuliaqut

Aningaaseriviup pisortaa apersorneqarnermini aalajangernermi pissutaasoq itisilerpaa.

Umiatsiaararsorlutik aalisartunut aningaasaliinerit unitsinneqarnissaannut aalajangerneq sumik tunuliaqutaqarpa?

- Pisassiissutit piffissami sivitsortumi annertuallaarujussuareersut aamma allanngorteqqinneqarput, taamatullu inuussutissarsiornermi aalisartut amerlavallaalersimallutik. Tamanna piujuaannartitsinissamut aningaasaqarnermullu innarliisinnaavoq. Taamaattumik nutaamik pitaalernermi atortunilluunniit taarsiilernermi aningaasaliisinnaanerit tamaasa unitsippagut. Tamanna uggornarpoq, ukiorpassuarnimi atuisugut pitsaalluinnarsimapput, taamatulli ingerlaannassagutta tamanna Kalaallit Nunaata aningaasaqarneranut isigineqarneranullu innarliisinnaavoq ulorianarluinnarlunilu. Kalaallit Nunaanni piujuaannartitsinissamik siunertaqarluta ingerlanissarput naatsorsuutigineqarpoq, tamannalu eqqarsaatigalugu maanna iliuuseqarpugut, Martin Kviesgaard Nuummi aningaaseriviup qullersaqarfianiittoq oqarpoq.

Kikkut eqqorneqassappat?

- Ajornartorsiutit takusinnaasagut tassaanerupput umiatsiaararsorluni qaleralinniarnermi, aammali sinerissap qanittuani saarullinniarnermi kiisalu saattuarniarnermi, piujuaannartitsinissaq siunertaralugu innersuussutit qaangerujussuarlugit pisassiisoqartarpoq. Aalisarnermut aningaasaliisarnermi taakku unitsippagut, itisiliivoq.

Sooq maanna qisuariarpisi?

- Pisassiissutit qaffaavigineqaqqittut takoqqammerpagut, naak aalisakkat minneruleriartortut, aalisartullu amerlingaluttuinnartut. Aalisartut – pingaartumik umiatsiaararsorlutik aalisartut – ukiuni kingullerni 50 procentimik amerleriarsimapput, pisassiissutillu biologit innersuussutaat qaangerlugit, ilaatigullu pisarineqarsinnaasut allaat sinnerlugit, qaffanneqartarput, tunngavilersuivoq, nangillunilu aalisakkat aalisartunit taama amerlatigisunit inuussutissarsiutigineqarnissaat naammagunaarsimasoq.

Naalakkersuisunut takutitsineq

- Pisassiissutit ikilisariaqarput, aningaaserivimmi pisortaq oqarpoq. Taama oqarnermini Naalakkersuisunut ersarilluinnartumik takutitsivoq aalisarnermi pisasseeriaaseq pillugu politikki allanngortinneqartariaqalersoq.

Martin Kviesgaardip nassuerutigaa aningaaseriviup malitsigisaanik aalisartut ilaat imaani inuussutissarsiornissaminnik unitsitsiinnartariaqalissasut allamillu suliassarsiorlutik, aalisakkammi aalisartut taama amerlatigisut inuussutissarsiuteqarnissaat nammassinnaanngilluinnaramikkit.

Atuisussinnut qanoq oqarusuppisi?

- Aap siullermik soorunami ajuusaarujussuarpugut, atuisugut aningaasanik atukkersinnaajunnaarlugit ilisimatittariaqaratsigit. Aamma naatsorsuutigaarput atuisutta ilaat aalisarnermi inuussutissarsiornerminnik unitsitsisariaqalissasut allamillu suliffissarsiorlutik, Martin Kviesgaard oqarpoq.

Inuussutissarsiummut tassunga aningaasanik atortitsisarunnaarnissinni annaasaqassavisi?

- Piffissami sivitsulersumi takusinnaasimavarput annaasaqarnissamut aarlerinaateqarneq annertunerusimasoq, tamannalu piviusunngussappat atuisutsinnut pinngitsoorani tuttussaavoq. Tunngaviatigut atuisugut pitsaasumik siunnersortuarumavagut. Umiatsiaaqqamik nutaamik imaluunniit motoorimik nutaamik pitaarniarluni aningaasaliineq aalisarnerup ineriartorneranut atajunnaavissimavoq, aningaaserivimmi pisortaq akivoq.

Atuisunik annaasaqarsinnaasut

Martin Kviesgaardip nassuerutigilluarsinnaavaa aalajangernerup kinguneranik atuisut ilaat annaasinnaallugit.

- Ilimagaara amerlanerit paasisinnaagaat umiatsiaararsorluni aalisarneq qajannarsisimasoq, Martin Kviesgaard oqarpoq.

Grønlandsbanken Naalagaaffeqatigiinni aningaaserivinni inissisimalluarnerit ilagaat. Sooq umiatsiaararsorlutik aalisartut imminiiginnassavisigit?

- Aap, aalisarneq ajalusooraluarpat aningaasaateqarluarpugut, illuatungaanili piujuaannartitsinissaq tunngavigalugu aalisartoqassappat aningaasaliisinnaassuseqarluarluta. Siornatigut oqareernikuuvugut aalisarnerup iluani milliuunilikkaanik 100-nik aningaasaliinerusinnaalluta, taamaattoqassappalli piujuaannartitsinissaq tunngavigalugu aalisarneq aqunneqartariaqarpoq. Aqutsineq ullumikkutut itsillugu aningaasaliisarnerput ingerlatiinnassagutsigu, taava aalisartut mianerinagit immineersimaannarsimassavagut. Taama ingerlaannassagutta aningaasaqarniarnermi siunnersuinerput kukkunerullunilu ajorluinnassaaq, aningaaserivimmi pisortaq erseqqissaavoq.     

Læs hele sagen:

  1. Politikkikkut siunnerfik nutaaq pisariaqarpoq
  2. Jollefiskerne kommer på udvalgsdagsorden
  3. Umiatsiaararsorlutik aalisartut ataatsimiititaliami oqaluuserineqartussanngortut
  4. KNAPK sinerissamut qanittumi aalisarneq pillugu iliuusissatut pilersaarusioqqusisoq
  5. Banknordik umiatsiaararsorlutik aalisartunut ikiuisarnerminik ingerlatsiinnarniartoq
  6. Aningaaseriviup aalisarneq pimoorunneqartoq erseqqissaatigaa
  7. Maanna iliuuseqartoqassaaq
  8. Naalakkersuisut umiatsiaararsorlutik aalisartut aningaasatigut ikiorserniarpaat?
  9. Krusep Grønlandsbanken kamaakkaa
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER