Skip to main content

Aningaaserivimmi pisortaaneq: Nungusaataanngitsumik ingerlatsinissamut pilersaarusiortoqarnissaa utaqqivarput

Grønlandsbankimi pisortaanerup Martin Kviesgaardip, nungusaataanngitsumik umiatsiaararsorluni aalisarnermi tunngavissanut pilersaaruteqartoqalernissaa, tassa umiatsiaararsorlutik aalisartut ikilisarneqarnissaannut pilersaarusiortoqarnissaa qilanaaraa

Aningaaserivimmi pisortaanerup aningaaserivini ataasinngormat umiatsiaraarsorlutik aalisartut aningaasaliiffigineqartarnissaannut matuaa. Sisamanngormat aningaaserivini ikerseqqilaarpaa, tassa umiatsiaararsorlutik aalisartut aningaasaqarnermikkut ajunngitsumik ingerlasut aningaasatigut ikiorseqqinneqarsinnaasunngorlugit.

Martin Kviesgaardip innersuussutigaa, Jens Immanuelsenip Sermitsiaq.AG-mut oqaaseqaateqarnermini imatut oqarnera ”alisartunut nutaanut qaleralinniarnermut akuersissutinik killiliisoqarsinnaanera naalakkersuisoqarfimmit sulissutigineqarpoq​​​​​​”.

Paasinninneq

Aningaaserivimmi pisortap nalunaarut imatut paasivaa, Naalakkersuisup umiatsiaararsorlutik aalisartunut akuersissutit ikilisarniarai.

- Nassuerutigissavara, Jens Immanuelsenip nalunaarutaata assigiinngitsutigut nassuiarneqarsinnaanera. Umiatsiaararsorlutik aalisartut nutaanik ilaneqanngippata umiatsiaararsorluni aalisarnissamut akuersissutit ikiliartussapput, tamannali arriitsunnguamik ingerlassaaq. Aalisarnerlu aningaasatigut nammanneqarsinnaanngippat tamanna sukkasuupilussuarmik pisinnaavoq, arlalippassuimmi aalisartuunissamut akissaarutissagamik, aningaaserivimmi pisortaq oqarpoq, nangillunilu:

- Soorunami Naalakkersuisut pilersaarusioreernissaannut utaqqissanerluta (aningaaserivipput ammaqqissanerlugu)​​​​​​​ nalilersorsimavarput, aamma imaassinnaavoq sukkavallaamik ammaaqqittugut. Isumaqarpungali aalisartoqarpallaarnera aamma uumasoqassuseq eqqarsaatigalugu nungusaataanngitsumik ingerlatsisoqarnissaa pillugit uagut, KNAPK, Sulisitsisut allarpassuillu erseqqissumik oqaatigisarsimavarput. Takoriartigu Naalakkersuisut qanoq iliuuseqassanersut, Martin Kviesgaard oqarpoq.

Pilersaaruteqartoqannginneq = aningaasaateqannginneq

Imaappa, nungusaataanngitsumik ingerlatsisoqarnissamut pilersaarusiortoqanngippat aningaasalersuisarnersi unitsivissagissi?

- Aap taamaappoq, Kalaallit Nunaanni aningaaseriviit annersaanni pisortaaneq erseqqissaavoq.

Ataasinngormat umiatsiaararsorluni aalisarnermut aningaasalersuinissaq aningaasatigut nammanneqarsinnaanngilaq. Ullulli pingasut qaangiummata ilaannut aningaasalersuinissaq ajornarunnaariasaarpoq. Aningaasaqarnikkut piumasaqaatit sutigut allannguuteqaramik?

- Aningaasaliissuteqarnissat suli ajornartorsiutitaqarput, isumaqarpugullu aalisartut ilaat aalisarunnaartariaqartut, taamaammat aalisartut ataasiakkaat soorunami eqqarsaqqittariaqarput. Tamanna pissutigalugu aalisartut ikilisarneqarnissaannut aalisarnerullu annikillisarneqarnissaanut piaarnerpaamik pilersaarusiortoqarnissaa akuersaarparput. Aalisalerlaat suli itigartinneqartassapput, Martin Kviesgaard oqarpoq.

Oqallinnersuaq

Ataasinngormat nalunaaruteqarneq sullitanik qanoq amerlatigisunik naleqarpa?

- Nalunngisara malillugu naleqanngilaq, aningaaserivimmi pisortaq siunissami aalisarnermik ingerlatsisarnissaq pillugu oqallinnersuarmik pilersitsisimasoq akivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER