Aningaaserivik: Inissiat pillugit assortuussutaasoq aningaasaliissuteqartarnermut akornutaasinnaavoq
Inissiat attartortittakkat pillugit Namminersorlutik Oqartussat illoqarfiilu pingaanersaata kommuniata aaqqiagiinngissuteqarnerat nutaanik aningaasaliissuteqarnissamut akornutaasinnaavoq, inissiat pillugit assortuussutaasup kommunimut qineqqusaarnermut ilanngunneqarsimasoq pillugu Grønlandsbanken mianersoqqusivoq.
Grønlandsbankenimit oqaatigineqarpoq, aningaasaliissuteqartartut amerlanerit ilaatigut inissianik nutaanik sanaartortoqarneranut ukiuni kingullerni ilanngussimanerat pitsaasuusoq. Tassunga atatillugu ”pingaaruteqarluinnarpoq” atugassarititaasut patajaattuunissaat, aningaaseriviup inuiaqatigiit aningaasaqarnerannik naliliinermi, aningaaseriviup 2020-mut naatsorsuuminik saqqummiussineranut atatillugu tamanut saqqummiunneqartumi tamanna oqaatigineqarpoq.
- Namminersorlutik Oqartussat kommunillu inatsisip ilaani assigiinngitsunik nassuiaateqarnerat aningaasaliissuteqartartut ilaasa pilersaarutaasutut aningaasaliissuteqarnissami naatsorsuutigisatut iluanaaruteqarnissaq qularutigilersinnaavaat, naliliinermi allassimavoq.
Soraarnerussutisiaqarnissamut aningaasaateqarfik tunuarsimasoq
Atugassarititaasunik qularuteqalertoqarsimaneranut assersuutitut PensionDanmark taavaa. Danmarkimi soraarnerussutisiaqarnissamut aningaasaateqarfik milliardilikkaanik aningaasaatilik, Namminersorlutik Oqartussat Kommuneqarfik Sermersoorlu siorna ukiakkut aaqqiagiinngissuteqarlermata tunuarsimavoq.
- Inatsisip aaqqissuussaanerata politikkikkut oqaluuserineqarnissaa soorunami politikkerit sulieranni qitiuvoq, aningaasatigulli suliaqarnissamik eqqarsaateqartunut tamatuma qanoq isumagineqarnera pingaarutilipilussuusoq, aningaaserivimmit oqaatigineqarpoq.
- Piffissami Kalaallit Nunaata nunarsuarmit tamanit sammineqaleriartorfiani ajornanngitsumillu paasissutissarsiffiusartumi suliamik isumaginninneq nutaanik ajornartorsiortitsilersinnaavoq, nunalu siunissami aningaasaliissuteqarsinnaasunik kajumitsitsilissaguni avataaniillu ilisimasat pisariaqartinneqartut pissarsiarineqassappata, saqqummiunneqartut sunniutissaat erseqqissumik oqaatigineqartariaqarput, aningaaserivimmit oqaatigineqarpoq.
Inissianik sanaartortoqarnerulernissaanut tunngaviusut
Grønlandsbanken inissianik niueruteqartarneq pillugu allappoq ”kaaviiartitaqarluarnissaq sivikitsumillu utaqqisoqartarnissaa pitsaasuusoq” nalilerneqartoq, aningaaserivimmilli maluginiarneqarsimasoq, pingaartumik aallaqqaammut pisiaqarniartunut akigititat unammillernarsinnaasut.
Naliliinermi inerniliunneqarpoq, initaarusuttoqarnera inissianik amerlanerusunik sanaartortoqarnerunissaanut tunngavissiillunilu pisariaqartinneqartoq.
- Pisariaqartitsineq illoqarfinni anginerusuni assigiinngitsuuvoq. Tamatuma inissianik nalinginnaasunik sanaartornissaq oqinnerulersissavaa.