Aningaaserivik aningaasat nalikillisimanerannit 10,7 mio. kr.-nik annaasaqarsimagaluarluni naammagisimaarinnittoq

Grønlandsbanken kvartalimi siullermi 29,6 millioner koruuninik angusaqarsimavoq, siorna piffissami pineqartumi 40,2 millioner koruuninik angusaqarsimalluni.

Grønlandsbanken kvartalimi siullermi siorna piffissami pineqartumit 11 millioner koruuningajalluinnarnik ikinnerusunik angusaqarsimavoq.

Aningaaserivimmit tusagassiorfitsigut nalunaaruteqarluni ilisimatitsissutigineqarpoq, aningaaserivimmi obligationiut nalingisa apparsimanerisa malitsigisaannik 10,7 millioner koruuninik nalikilliisoqarsimaneranit angusat annikinnerusut.

Akerlianik aningaaseriviup taarsigassarsiarititamigut annaasai nalikkililersimasaalu siorna piffissamut pineqartumut sanilliullugu 0,9 millioner koruunininiit 0,7 millioner koruuninut apparsimapput.

Aningaaseriviup kvartalimi siullermi erniatigut akitsuutitigullu isertitai 2021-mi piffissamut pineqartumut 2,4 millioner koruuninik amerlanerulersimagamik katillugit 88,5 millioner koruuninik isertitaqarsimavoq.

- Aallartilluarneq

- Isertitaqarnerusimanermut ilaatigut pissutaapput, aningaasaliissuteqartarfiit soraarnerussutisiaqarfiillu aningaasat uninngasuutigisaasa erniaat iluanaarutissartaqanngitsut aamma akitsuutaasa iluanaarutaasalu pitsaanerulersimanerat, aningaaserivik kvartalimut naaatsorsuusiamini allappoq.

Taarsigassarsiaritinneqarsimasut qularnaveeqqutigineqarsimasullu aamma 126 millioner koruuninik amerlanerulersimagamik 5,7 milliarder koruuninngorsimapput, aningaaserivimmilu pisortaanerup Martin Kviesgaardip kvartalimi siullermi angusarineqarsimasut naammagisimaarpai:

- Ukioq aallartilluarparput, aamma inuinnaat suliffeqarfiillu sullitatta suliaqarsimanerat pitsaasuuvoq. Pingaartumik suliffeqarfiit sullitavut ulapissimapput, tamannalu uagutsinnut sunniuteqarsimalluni, Martin Kviesgaard nalunaaruteqarluni oqarpoq.

Aningaaserivimmit oqaatigineqarpoq, erniat qaffakkiartornerisa aningaasallu naleerukkiartornerisa kingunerannik suli unammilligassaqartoqalersimanngitsoq:

Ininik piginnittut illersugaalluartut

- Kalaallit Nunaanni realkreditimik taarsigassarsiat erniaasa qaffassimanerat malugineqarsinnaavoq, ininilli piginnittut aalajangersimasunik erniaqartinneqarnermikkut illersugaalluarput, taamaammat siullermeerlutik ininik pisiaqarsimasut ineqarnermut aningaasartuuteqarnerulaartarput, immaqalu inimik mikinerusumik pisiaqartariaqartarlutik, Martin Kviesgaard oqarpoq, nangillunilu:

- Angerlarsimaffinni sanaartornermilu atugassat akitsoriartornerat malugineqarsinnaavoq. Nukissiuuteqarnermulli akigititat qaffakkiartornerisa Kalaallit Nunaanni suli maannamut atuutsinneqalinnginnerat iluaqutigisimavarput. Taamaammat tamatuma sunniutaa nunanit allanisuulli annertutiginngilaq, nukissiuuteqarnermullu akigititat maani nunami qaffaqqinnerussanersut oqaatigissallugu suli siusippallaarpoq, Maannamut sanaartornermi akigititat ulluinnarnilu inuussutissat akiisa qaffakkiartornerat malunnarnerpaasimavoq.

Naatsorsuutini aningaasartuutaasimasut kvartalimi siullermi allannguuteqaraik 49,2 millioner koruuniusimapput, aningaaservimmillu akileraarutit suli peernagit ukiumi 120-140 millioner koruuninik angusaqartoqarnissaa naatsorsuutigineqarpoq.

Ukrainemut Ruslandimulluunniit aningaasatigut toqqaannartumik pillaatitut iliuuseqartoqassanngitsoq

Ukrainemi sorsuttoqarnerata kinguneri pillugit aningaaserivik allappoq:

- Russit Ukrainermut saassussinerat assersuutigalugu nioqqutissanik pilersuiniarnermut Europamilu tamarmi aningaasat naleerukkiartornerannut sunniuteqarsimavoq sulilu sunniuteqangaatsiarnissaa naatsorsuutigineqarluni. Sunniutaali Kalaallit Nunaanni suli annertunngilaq, Aningaaserivik Ukrainermut Ruslandimulluunniit aningaasatigut toqqaannartumik pillaatitut iliuuseqarnianngilaq.

Powered by Labrador CMS