Skip to main content

Aningaasat naleerukkiartornerannut ikiorsiissutissat kiisami isumagineqalersut

Sermitsiaq.AG-p paasissutissaatai naapertorlugit, nunamut maanga assartuinermi uuliamut tapiliussat qaffaffiartungaatsiarneri annikillisinniarlugit Royal Arctic Linep aningaasatigut ikiorserneqarnissaa matumani pineqarpoq.

Naalakkersuisut septembarip aallartinneranili nalunaarutigaat, innuttaasut isertitakinnerusut pisiniarfinni akit qaffakkiartornerannit eqqugaasimasut ikiorserneqassasut. 

Nunami maani ulluinnarni nioqqutissat akii qaffakkiartorput, ilaatigut Ukrainemi sorsuttoqarnerata kinguneranik nunani tamalaani nalorninartorsiortoqarnerata malitsigisaanik Royal Arctic Linep umiarsuaataannut ikummatissat akitsorujussuarsimanerat pissutigalugu.

Taamanikkulli ikiorsiissutissat pillugit nutaarsiassiisoqarsimanngilaq, maannali nutaarsiassiisoqarpoq. Aningaasaqarnermut Naalakkersuisup Naaja H. Nathanielsenip (IA) sisamanngornermi Sermitsiaq.AG-mut ilisimatitsissutigaa, ikiorsiissutissat pillugit nalunaaruteqarsimaneq ullumi tallimanngorpalluunniit atuutsinneqalissasoq. Ikiorsiissutissat Inatsisartut Aningaasaqarnermut Akileraartarnermullu Ataatsimiititaliaanik akuersissutigineqaqqaartussaapput.

Naaja H. Nathanielsenip oqaatigerusunngilaa, ikiorsiissutissat suunersut, Sermitsiaq.AG-lli paasissutissaatai malillugit, ikiorsiissutigineqarniartut RAL-imut ikiorsiissutaassapput, RAL uuliamut tapiliussamik januaarimili qaffangaatsiarsimasumik appaanissamut periarfissinniarlugu.

- Ajortumik inissisimasoqartoq

RAL KNI-tulli aalajangersimasumik akeqartitsinissamut isumaqatigiissuteqanngilaq, nunami maani ikummatissat akitsoriartornerannik pinngitsoortitsisinnaasumik. Taamaammat assartuinermi akit qaffangaatsiarsimapput, tamatumalu ulluinnarni nioqqutissat akii sunnersimavai.

Naaja H. Nathanielsen ikiorsiissutissat pillugit imatut oqarpoq:

- Ataatsimut isigalugit ajortumik inissisimasoqarpoq. Ikiorsiissuteqarniarnerput piviusunit akillu qaffakkiartornerannit innuttaasunut sunniuteqartunit tunngaveqarpoq.

Taassuma nassuerutigaa, ikiorsiissuteqarnikkut aningaasat naleerukkiartornerusinnaasut, tamannali pisariaqarnerarpaa:

Inuussutissat qitiutinneqartut

- Ikiorsiissuteqarnitsinni aningaasat naleerukkiartornerulersissinnaavagut. Aningaasaqarnermik ilisimasallit ikiorsiissuteqarnissaq inassutiginngilaat.

- Nunami nunanut uatsinnut assersuuttakkatsinnut sanilliiullu agguaqatigiissillugu isertitakiffiunerusartumi najugaqarpugut. Pisiniarfimmut ataasiinnarmut pisiassatit pisiariartorsinnaavatit. Inuppassuillu Pilersuisoq kisiat pisiniarfigisinnaavaat. Tamanna isummerigisariaqarparput, ukiuuneranummi pilersuinissaq nallilerparput, Nathanielsen oqarpoq, nangillunilu:

- Inuussutissat qitiutippagut. Aamma attaveqaasersuutit allallu eqqarsaatigalugit summiffinnut allanut sanilliulluta allatut inissisimavugut. Meeqqat utoqqaallu ullutsinni inuusut atukkamikkut ilungersunartorsiorneqat politikkerisut tusaaanngitsuusaarsinnaanngilagut.

Sumiiffiit aalajangesimasut eqqoruminaattut

Aningaasaqarnermut Siunnersuisoqatigiit aamma ukiumoortumik nalunaarusiaminni, sisamanngornermi saqqummiunneqartumi mianersoqqusipput. Siunnersuisoqatigiinnit oqaatigineqarpoq, politkkerit siammasissumik suliniuteqarnaveersaartariaqartut, suliniutiginiakkallu innutaasunut isertitakinnerpaanut tunngatillugit tapiissuteqarallartoqarsinnaasoq.

Nathanielsenip oqaatigaa, Aningaasaqarnermut Siunnersuisoqatigiit ullumi nalunaarutigisaat malillugit Naalakkersuisut iliuuseqartut: 

- Illoqarfinnut sikusartuniittunut ukiuunerani pilersuinissap qulakkeerneqarnissaat matumani pineqarpoq. Sumiiffiit aalajangersimasut kisiisa eqqarsaatigalugit suliniuteqaruminaappoq. Illoqarfinni anginerusuni inunnut isertitakinnerusunut tamanna aamma ikiuutaassaaq, taanna oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER