juullimi tunissutit
Aningaasat julekortinut atugassat meeqqanut kræftertunut tunniunneqarput
Grønlandsbankip atuisartunut niuernermilu attaveqarfimminut julekortit juullimi pilluaqqussutit sipaarutigai. Taarsiullugu aningaaseriviup 25.000 koruunit Kalaallit Nunaanni kræftimut akiuiniarnermut tunniuppai
Grønlandsbanki ukioq manna aalajangeqqippoq atuisartuminut niunermilu attaveqarfimminut julekortinik juullimi pilluaqqussutinik nassiussuisarnini sipaarutiginiarlugu. Taarsiullugu aningaasat tamatumunnga atugassat 25.000 koruunit Neriuffiit Kattuffianni meeqqanut aningaasaateqarfimmut tunniunneqarput.
Juullimut qilanaarput
Grønlandsbanki naapertorlugu Juliane D. Berthelsenip Johanne Olsenillu Neriuffiit Kattuffiat sinnerlugu aningaaserivimmit checki tigugamikku isaat juullimut qilanaarpasipput.
– Aningaasat kalaallinut meeqqanut inuusuttunullu kræftimik eqqugaasunut, piffissami ajornakusoorfiusumi ikorfartuutitut agguaatissavagut, Neriuffiup sinniisui taakkua marluk oqaluttuarput.
Aningaaserivimmi sulisut ataatsimoorlutik aalajangersimavaat aningaasat sumut atorneqassanersut.
Nukarlerpaanut
Grønlandsbankip erseqqissarpaa nuna inuuffigisartik, ingerlatsivimmillu ingerlatsivitsik tapersersortuugini.
– Julekortit sipaarutigineqarnerisigut ukioq manna innuttaasut nukarlerpaat, immikkut qiimmassartariaqarsinnaasut, immikkut iliuuseqarfigilaarsinnaavagut. Qularutiginngilara tamanna atuisartutta niuernikkullu attaveqarfigisatta julekortimik pinissamininngarnit pingaarnerutikkaat, Nuummi aningaaseriviup pisortaata tullia Yvonne Kyed oqarpoq.
Aningaaseriviup paasissutissiissutigaa, ukiut sisamassaa tulleriisiinnarlugu Grønlandsbankip aningaasat juullimi pilluaqqussutinut atugassaraluani ajunngitsuliornermut tunniukkai. Siorna aningaasat Nuummi angerlarsimaffeqanngitsunut Nuuk Herbergimut tunniunneqarput, 2013-imilu aningaasat Meeqqat Inuunerissut/Bedre Børnelivimut tunniunneqarput.