Aningaasartuutit pillugit ammanerunissaq Naalakkersuisut itigartitsissutigat
Akiliutit aamma angalanermut aningaasartuutit nittartakkamut ilineqartalernissaat pillugit Suleqatigiissitsisut siunnersuutaat Naalakkersuisut akerlilerpaat.
Naalakkersuisut ataasiakkaat aningaasat sumut atortarneraat pillugu ammanerusoqarnissaanik Suleqatigiissitsisut kissaateqarput.
Taamaattumillu partii siunnersuuteqarpoq, ’akiliut atorlugu aningaasartuutit, ilassinninnermut aningaasartuutit kiisalu angalanermut aningaasartuutit ilassutitallit Naalakkersuisutut sulinermut atatillugu aningaasartuutit qaammatit pingasukkaarlugit tamanut takusassiarisalernissaat’.
- Suleqatigiissitsisuni isumaqarpugut innuttaasup kialluunniit takusinnaasariaqaraa aamma tamakkiisumik ammasumik, innuttaasut aningaasaataat sumut atorneqartarnersut, Naalakkersuisuni, Inatsisartuni taamatullu kommunini, partiip Inatsisartunut ilaasortaatitaa, Tillie Martinussen siunnersuummut tunngavilersuummi taama allappoq.
Ammanerulernerup pisortat aningaasaataannik atornerluineq pitsaaliorsinnaagaa, taanna isumaqarpoq.
- Isertorneqassanngilaq nuanniitsunik pisoqartarnikuummat akileraartartut aningaasaataannik atuineq eqqarsaatigalugu, taakkulu allaanerusumik atorneqarsimanissaat innuttaasut kissaatigisimassaqqooqaat.
Innuttaasut takusinnaasariaqarpaat akileraarutitik sumut atorneqartarnersut.
- Inatsimmimi pineqartumi Naalakkersuisut tusatsiakkanut pilersinnaasunut illersorneqarput aamma qularnaarneqarpoq Pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaata allamut sangutinneqannginnissaa, tamannalu pillugu atorfillit taamatullu pissaanermik tigumminnittartut nikittaattut pikkorissarfigisariaqarpaat.
- Matuma siunnersuutip akuerineratigut qularnaarneqassaaq ilanngussat attuumassuteqartut qarasaasiakkut saqqummiunneqartalernissaat kikkunnit tamanit takuneqarsinnaallutik, inatsisiliortunit, tusagassiutinit aamma kikkunnilluunniit allani, taanna tunngavilersuummini nangilluni allappoq.
Kisianni siunnersuutip atuutilersinnissaa akisuallaartoq Naalakkersuisut isumaqarput, kiisalu ammanerunermik kinguneqarnavianngitsoq.
Suliamut tunngatillugu kikkulluunniit ullumikkut takunnissinnaatitaareermata ilisimassallugu pingaaruteqarpoq. Taamaalillunilu malittarisassat atuuttut malillugit Naalakkersuisut aningaasanik atuinerannik paasisaqarnissamut takunninnissamullu pitsaasunik periarfissaqareerpoq, aningaasaqarnermut naalakkersuisoq, Vittus Qujaukitsoq (NQ) akissuteqaammini taama allappoq.
Aammattaaq bilagit sorliit saqqummiunneqassanersut, sorliillu nipangiussisussaatitaanermik peqqussuteqarnersut takuniarlugit bilagit misissortittarnissaat akeqassasoq, taanna allappoq.
- Taamaattumillu aalajangiiffigisassatut siunnersuummi aaqqissuussineq siunnersuutigineqartoq Naalakkersuisut aningaasaliissutinik isumatusaartumik atuinerannut annertunerusumik ersarinnerulersitsinavianngitsoq Naalakkersuisut ataatsimut isigalugu isumaqarput. Akerlianilli ataatsimut isigalugu suliap tamatuma ingerlanneqarnera akisunerulersissallugu.