Aningaasartuutinik misissueqqissaarneq: Napparsimasoqartarnera pissutaalluni aningaasartuutit amerlipput

Namminersorlutik Oqartussani sulisut napparsimakulasartut misissueqqissaarneq Aningaasaqarnermut Naalakkersuisoqarfiup suliaani takuneqarsinnaavoq.

Piffissami 2016-2018 qitiusumik allaffeqarfissuarmi sulisunut aningaasartuutit 50 million koruunit missaannik qaffapput. Procentinngorlugu 15 procentit, ilaatigut atuarneqarsinnaavoq.

Suliffimmik nalilersuilluni misissuinerup 2018-imi ilaatigut takutippaa ikkataanermik annertuumik misigisaqarnerup aamma napparsimalluni takkutinngitsoornerit akornanni ataqatigiittoqartoq.

- Namminersorlutik Oqartussani aningaasarsianut aningaasartuutit qaffannerinut nassuiaataasinnaasoq tassaavoq napparsimalluni takkutinngitsoortarnerit qaffasinneri. Napparsimalluni takkutinngitsoortarnerit qaffasissut pissutigalugit nalinginnaasumik naatsorsuutigineqarsinnaasunit amerlanerusunik sulisoqartariaqarnerup pisariaqarnera (kiisalu suliassat ilai naammassineqanngitsoorlutik), misissuinerup takutippaa.

Napparsimalluni takkutinngitsoornerit pillugit paasissutissat Namminersorlutik Oqartussat piffissamik nalunaarsuiffianit, Webtasimit pissarsiarineqarput, taannalu taamaallaat qitiusumik allaffissuarmi atorneqarluni atorfeqartunillu tamarmiunngitsunit, taamaattorli amerlanerpaartaannit.

Akunnerit 100-t sinnerlugit

Napparsimalluni takkutinngitsoornerit amerlanersaat Kommuninut, Nunaqarfinnut, Isorliunerusunut, Attaveqarnermut Inissiaqarnermullu Naalakkersuisoqarfimmiipput kiisalu aqutsisoqarfinni pingasuni.

- Naalakkersuisoqarfilli aqutsisoqarfinnut naleqqiullugu mikisuararsuuvoq, taamaalilluni sulisup ataatsip sivisuumik napparsimanera takkutinngitsoornernut tamarmiusunut annertuumik sunniuteqarsinnaalluni. Napparsimalluni takkutinngitsoorneq taamaattumik aqutsisoqarfinni pingasuni malunnarnersaalluni: Aningaasaqarnermut Sulisoqarnermullu Aqutsisoqarfik, Akileraartarnermut Aqutsisoqarfik aamma Peqqissutsimut Pitsaaliuinermullu Aqutsisoqarfik, erserpoq.

Aningaasaqarnermut Sulisoqarnermullu Aqutsisoqarfik, Isumaginninnermut Aqutsisoqarfik aamma Akileraartarnermut Aqutsisoqarfik 2018-imi ukioq naallugu sulisumut ataatsimut 130-150 tiimit akornanni napparsimalluni takkutinngitsoorfiusimapput, Peqqissutsimut Pitsaaliuinermullu Aqutsisoqarfik 106 tiimini napparsimalluni takkutinngitsoorfiusimalluni ukioq naallugu sulisumut ataatsimut appasinnerulaarluni.

Pitsaanerusariaqartoq

Aningaasaqarnermut naalakkersuisoq Vittus Qujaukitsoq (NQ) misissuineq pillugu ima oqarpoq:

- Naalakkersuisut misissueqqissaarneq nuannaarutigaat, taannami aallaavigalugu siunissami Namminersorlutik Oqartussat allaffeqarfiata suliassanik isumatusaartumik aningaasaqarnikkullu pitsaanerusumik qanoq naammassinnissinnaanera piviusorsiortumik, paasissutissanillu toqqammaveqartumik oqallisigisinnaalerparput.

- Nalunaarusiornikkut alloriarneq siulleq aallartipparput. Nalunaarusiallu kaammattuuterpassuisa piviusunngortinnissaat alloriarneq tulliussaaq. Taakku ilaat tassaavoq qanoq iliornikkut sulisorpassuit pikkorissut akisuumillu piginnaanngorsakkatta sulisoriinnarnissaannut pikkorinnerulernissarput, taamaaliornitsigummi suliat pitsaanerusumik naammassineqarnissaat assigiiaarnerusumillu ingerlatsineq isumannaassavarput.