Aningaasarsiat: Vittup isummani allanngortippaa

Tunngaviusumik inatsisissaq pillugu isumalioqatigiissitami politikkerit isumalioqatigiissitami sulinerminni aningaasarsisarnissartik naatsorsuutigissanngilaat

Aningaasaqarnermut Naalakkersuisup Vittus Qujaukitsup marlunngormat ilisimatitsissutigaa, politikkerit Inatsisartuni ilaasortat Tunngaviusumik inatsisissaq pillugu isumalioqatigiissitami issiasut sulinerminni aningaasarsiaqartinneqassasut.

Aalajangiineq tamanna ulloq unnuarlu qaangiutiinnartoq allanngortinneqarpoq.

Sermitsiaq.AG-mit marlunngormat ullup qeqqanut saqqummiunneqarpoq, Inatsisartuni-politikkerit politikkeritut sulinerminni aningaasarsilluartaraluartut immikkut qaavatigut aningaasarsiaqartinniarlugit aalajangertoqarsimanera.
Peqatigitillugulu mamakujuit, tupat, immiaaqqat viinnillu akitsuutaannik qaffaanissamut inatsimik aalajangersaapallattoqarluni, innuttaasorpassuarnik inuiaqatigiinnilu sannginnerpaanik eqquisussamik.

Oqallinnersuaq

Aalajangiineq Sermitsiaq.AG-mi nutaarsiat pillugit oqaaseqartarfiani oqallinnersuarmik pilersitsisimavoq.

Tunngaviusumik inatsisissaq pillugu isumalioqatigiissitami polikikkerit amerlanerusunik aningaasarsisalissapput pillugu oqallinneq atuaruk

Allattut ilaat soorlu allattoq:

- Naammaleqaaq. Innuttaasut akerliliiisariaqarput.Aammaarluni kanngunaannarpoq, inuuniutigalugu politikkerneq, kalaallit politikkeriisa erseqqilluinnartumik atugarilersimagaat isigalugu. Kanngusunngilluinnarpulluunniit, aamma anguniagartik anguniarlugu qanorluunniit iliortarput.

Demokraatit isumaqataanngitsut

Innuttaasut qisuariarnerat Demokraatinut tupatsitsisimannguatsiarpoq. Partiimi siulittaasuugallartoq Nivi Olsen ullaap tungaani partiit siuttuisa saqqummiineranni ilisimatitsivoq, partii aningaasarsiaqartitsinissamik aalajangiinermut isumaqataasimanngitsoq.

Tunngaviusumik inatsisissaq pillugu isumalioqatigiissitap siulittaasoqarfiata isumaqatigiittup aningaasarsiaqartalernissamik kissaateqarneq Vittus Qujaukitsumut apuussimavaa. Nivi Olsen isumalioqatigiissitami aamma ilaasortaavoq.

Múte B. Egede partii tapersersortaasoq naalakkersuisooqatigiillu isumaqatigiippallaanngitsut takugamiuk Vittus Qujaukitsoq aperaa, aningaasarsiaqartitsinissamut amerlanerussuteqarunnaarmat qanoq iliuuseqarniarnersoqt.

Politikkikkut imminut pisarineq

Aningaasaqarnermut Naalakkersuisup akissutaa, ualimut pingasunut tanneq arfineq-pingasut mailikkut takkuppoq, tassalu 2020-mut Aningaasanut inatsisissamut, ippassaq saqqummiunneqartumut allannguut iluarsiissutitalik.

Ualimut tallimanut qiteqquppat, innuttaasorpassuit akitsuutinik qaffaanermut nuannarineqanngeqisumut akerliussutsimik takutitsiniarput.

Politikkikkut imminut pisarineq, Nivi Olsenip VAR-dommeritut assortuussutaasinnaasunik oqaaseqarfigisimasaa pillugu Vittus Qujaukitsoq oqaaseqartinniarlugu iluatsinneqanngilaq.

Powered by Labrador CMS