Aningaasaqarnermut Siunnersuisoqatigiit: Piffissaq ungasinnerusoq eqqarsaatigalugu unammilligassat naammassineqarsimanngillat
Aningaasaqarnikut ingerlalluarnerup nalaani akitsuutinik qaffaariasaarsimaneq pitsaanngilluinnarpoq, taamatut isumaqarpoq Aningaasaqarnermut Siunnersuisoqatigiinni siulittaasoq Torben M. Andersen
Aningaasaqarnikkut maannakkorpiaq ingerlalluartoqarpoq, piffissarli ungasinnerusoq eqqarsaatigalugu nunap aningaasaqarnera ajorseriaannaavoq. Unammilligassaqaqaaq. Aamma aningaasanut inatsisissaq isumaqatigiissutigineqaqqammersoq siunissamut isumalluartitsinngilaq
AG taamatut allappoq.
Professori Toben M. Andersen Kalaallit Nunaanni Aningaasaqarnermut Siunnersuisoqatigiinni sulittaasuusoq naapertorlugu aningaasanut inatsisissatut isumaqatigiissutigineqarsimasoq pitsaasunik arlalinnik imaqarpoq, kisianni:
Oqimaaqatigiissitsineq
- Aningaasaqarnikkut ingerlalluarfimmi aningaasanut inatsit oqimaaqatigiissinniarlugu akitsuutinik qaffaanerup takutippaa, siunissami unammilligassat aaqqiiffiniarneqarnissaat ajornartinneqartoq aamma ullumikkut isertitaqarfigineqartartut tamarmik pingaaruteqarnerat takujuminaatsinneqartoq, taanna oqarpoq.
- Taamatut akitsuutinik qaffaanikkut innuttaasut utoqqaaneruleriartortut siunissami aningaasaliiffigineqarnissaannut unammilligassat aamma aaqqiiffigineqanngillat, taanna ilanngussilluni oqarpoq.
Pitsaasunik immikkuualuttortalik
Akerlianik aamma aningaasanut inatsimmi aningaasaqarnikkut pitsaasumik ingerlatsisoqarniartoq takuneqarsinnaavoq:
Nioqqutissat akisuneruleraangata inuit isertitaqarnerulerusullutik suliffittaarusunnerulersarput. Sulinermut ilanngaat aamma taamatut sunniuteqassaaq.
- Aamma akitsuutinik qaffaanerit (sukkunut, imigassanut cigarettinullu) pifiissaq ungasinnerusoq eqqarsaatigalugu innuttaasut peqqinnerulernerannik kinguneqassapput, Torben M. Andersen oqarpoq.