Aningaasaqarnermut Siunnersuisoqatigiit: Inuit meeqqeriviit pitsaasut pillugit nuuttarput
Innuttaasut ikiliartornerani aningaasaqarneq tatineqaraluttuinnassaaq. Aningaasarsiornermi siuariartorneq meeqqeriveqarfiillu pitsaasut pissutigalugit innuttaasut amerliartoqqilersinnaapput.
Kalaallit Nunaat innuttakilliartorpoq, tamannalu inuiaqatigiinni aningaasaqarnikkut tatisitsisinnaavoq. Ineriartornerullu illuatungaanut saatinnissaa pingaaruteqarpoq. Torben M. Andersen, Aningaasaqarnermut Siunnersuisoqatigiinni siulittaasoq, nassuiaavoq.
Taamaattoqassappalli, allat oqaaseqareersut assigalugit, Torben M. Andersenip tikkuarpai eqimattat nunatsinnit aallarsimasut uteqqinngitsoorsimasullu. Taakku uterteqqissinnaagaanni, innuttaasut amerliartulissagaluarput.
- Nalunngilarput arlallit qisuariarfigisaraat meeqqeriviit paaqqinnittarfiillu pitsaassusaat. Pingaartumik aamma meeqqat atuarfiat. Misissuinerit arlallit takutippaat, nuunnialernermi tamakku aamma eqqarsaatigineqaqqaartartut. Eqimattat nuttarnerpaat tassaapput inuit meerartaarusuttut imaluunniit mikisunik meeraqareersut, Torben M. Andersen oqarpoq.
Siuariartorneq pilerinartuuvoq
Aningaasaqarnikkut siuariartornerup, inuit nunamit aallarsimasagaluartut, aamma uterteqqissinnaavai. Tamanna Savalimmiuni Irlandimilu takuneqareerpoq. Kalaallit Nunaanni aningaasaqarneq siuariartorlualereerpoq, sulisussanilli amigaateqartoqarpoq, taamaammat innuttaqqortussuseq aalajangiisuungaatsiarpoq.
- Aningaasaqarnerup siuarsarnissaanut inuit isumalluutissat ikiliartorput. Ima oqartoqaannarsinnaavoq, nammineq innuttakinnerugaluttuinnaraanni, taava avataaniit suliartortussanik pisariaqartitsineq annertuneruleriartussaaq. Mittarfiliortoqarniarpoq, tassanilu sulisoqartariaqarpoq. Iluaqutissartaqarnerussaaq najugaqavissut sulisikkaanni, amigarpatali avataaniit sulisussarsiortoqartariaqarpoq, Torben M. Andersen oqarpoq nangillunilu:
- Mittarfinnik talliliinerup kinguneranik inuussutissarsiorneq kissaatigineqartutut siuariartulissappat, amerlanerit uternissaat ilimanarsinnaavoq.
Taamatulli ineriartorneq nunarsiarmi tamarmi takuneqarsinnaasoq, taanna erseqqissaavoq. Inuit illoqarfinnut annernut nuttarput. Tamannalu Kalaallit Nunaannut isumaqarpoq inuit nunamit allanut noorartut.