Skip to main content

Aningaasaqarnermut Siunnersuisoqatigiit mianersoqqusisut

Nunarsuarmi sumiiffinnut allarpassuarnut sanilliullugu Kalaallit Nunaanni aningaasaqarneq corona nunarsuarmi tuniluukkaluartoq ingerlalluarpoq. Nunattali Karsiata imai imminnut ataqatigiissappata pingaartumillu aningaasaqarnikkut imminut napatinnerusoqassappat aaqqissuusseqqittoqartariaqarpoq.

Kalaallit Nunaata aningaasaqarnera 2020-mi en procentingajammik siuariarsimavoq, 2021-milu 1,8 procentimik annertuseriassasoq, Aningaasaqarnermut Siunnersuisoqatigiit nunap aningaasaqarnera pillugu ukiumoortumik nalunaarusiaminni naliliipput.

- Suliffissaqartitsinermi siuariartoqarpoq aammalu sanaartornerup atuinerullu siuariarnerat qaffasilluni. Avataasiorluni raajarniarnermi pisat aamma pisassiissutit qaffasissut kingunerannik qaffakkiartorput. Aalisarnermi nalornissuteqarneq aalisakkat qaleruallillu akiisa suli allanngorarnerannut tunngavoq, siunnersuisoqatigiit nalunaarusiaminni allapput.

Ilimagineqarpoq 2022-mi siuariarneq 2,5 procentiussasoq. 2022-mi siuariarnerup ilimanaataa ilaatigut nunarsuarmi tuniluunnerup allanngoriartoqqinnissaanit aamma Kalaallit Nunaanni nunarsuarmilu akiuussutissap atuutilersinneqarneranit Kalaallit Nunaanni takornariaqarnermut pingaaruteqartorujussuusussamit sunnerneqarpoq. Ilimagineqarpoq sanaartorneq aappaagu qaffasissorujussuuginnassasoq, ilaatigullu mittarfiliornernut atatillugu suliat annertussallutik.

Piffissami aggersumi suliffissaaleqisoqanngingajassasoq oqaatigineqarpoq. Siunnersuisoqatigiit naapertorlugit inuit ilinniagaqarsimasut suliffissaaleqisuunngillat. Unammilligassaanerarpaalli inunnik ilinniagaqarsimanngitsunik sulisussarsiortarnissaq aamma ilinniagaqarsimanngitsut piginnaanngorsarneqarnissaat.

Aaqqissuusseqqittoqarsimanngitsoq

Aningaasaqarnermut Siunnersuisoqatigiit susasssaqarfiit arlallit eqqarsaatigalugit aamma mianersoqqusipput. 

Tamatumani assersuutigalugu pineaqarpoq Naalakkersuisunngorlaat aningaasanut inatsisissatut siunnersuutaasa annerusunik aaqqissuusseqqinnissamik imaqannginnera. Siunnersuisoqatigiit nassuerutigaat, aaqqissuuteqqitassat peqqissaarullugit pilersaarusiorneqartussaanerat, tassungali ilanngullugu allapput:

- Peqatigitillugu aaqqissuusseqqinnermik suliaqarneq aallartissallugu aamma pingaaruteqarpoq. Ajornartorsiuterpassuit ilisimaneqarluarput piffissallu sivisuup
ingerlanerani oqallisigineqartarnikuullutik. Immikkoortuni arlalinni aaqqissuusseqqinnissanik kinguartitsineq naleqqussaanermi ajornartorsiutinik ilungersornarnerulersitsissaaq, nalunaarusiami allassimavoq.

Nunatta Karsianut ajornartorsiutit annerpaartarisassaasa ilagaat, amerlanerujartuinnartut soraarninngorpata sulisinnaasut ikinnerulernissaat - tassa imminut napatinnerulernissamut ajornartorsiutitut taaneqartartoq.

Tassunga atatillugu siunnersuisoqatigiit oqaatigaat, inuuneqqortusiartornermut ilutigitillugu soraarninngornissamut ukiorititap qaffanneqarnerat kiisalu pisortat ingerlatsinerat imminut napatissinnaanermik aaqqiinissamut annertuumik tapersiisinnaassasut.

Aatsitassarsiornermik inuussutissarsiuteqartut patajaattunik atugassaqartinneqarnissaat pingaaruteqartoq

Ukiorpassuit ingerlaneranni aatsitassarsiornerup ineriartortinneqarnissaa pingaartinneqarsimavoq, siunnersuisoqatigiillu oqaatigaat, aatsitassarsiornissaq aningaasaqarnikkut imminut napatinnerunissamut pingaaruteqarluinnartoq. Siunnesuisoqatigiinnit aamma oqaatigineqarpoq, sinaakkutissatigut atugassaritinneqartut piffissap ingerlanerani ingerlatsinermi allanngorannginnissaat pingaaruteqartoq:

- Tamanna aatsitassanut piiarneqarsinnaasunut, tassanilu atugassaritinneqartunut tunngatillugu atuuppoq. Sinaakkutaasunik atugassaritinneqartunillu nalornissuteqarneq aningaasaliinernut ajortumik sunniuteqartarpoq. Tamanna pingaartumik aatsitassarsiornernut aallarnisaalluni aningaasaliinissamik pisariaqartitsiviusunut, piffissallu
sivisuup ingerlanerani aningaasaliiffiusartunut atuuppoq, Aningaasaqarnermut Siunnersuisoqatigiit allapput.

Siunnersuisoqatigiit toqqaannartumik isornartorsiuinngillat, nalunaarusiaminnnili uuliasiornissamik gassisiornissamillu ingerlatsisimaneq eqqavaat. Maanna Naalakkersuisuusut siuliisa pineqartunut atatillugu periusissiassaq nutaaq 2020-mi januaarip qaammataani akuerivaat. Naalakkersuisunngortulli nutaat periusissiaq atorunnaartillugu siunissami misissuisarnissaq unitsippaat.

Kuannersuarni suliniummut atatillugu assingusumik allannguisoqarsimavoq, tassani Naalakkersuisunngortut nutaat suliniummik unitsitsisussamik siunnersuuteqarsimapput.

Aalisarneq aaqqissuuteqqinneqartariaqartoq

Aalisarnermik ingerlatsineq nalunaarusiami aamma oqaasertalerneqarpoq. Siunnersuisoqatigiit tassunga atatillugu oqaatigaat, aningaasaqarnikkut imminut napatinniarluni Kalaallit Nunaanni inuussutissarsiutit pingaarnersaata inuiaqatigiit aningaasaqarneranni pissarsivigineqarnissaanut annertuunik ajornartorsiuteqartoqarpoq,
pissarsiarineqartartut pissarsiarineqarsinnaasunit ikinnerummata.

- Tamanna aningaasaqarnermi sunniuteqarnerusumik aalisarnerup pisariaqartitsiviuneranit annertunerusumik inuussutissarsiummi aningaasaqarnermut sulisoqarnermullu tunngasut kinguneraat, siunnersuisoqatigiit allapput.

Siunnersuisoqatigiit naapertorlugit, aalisakkat pisarineqartartut inunnit ikinnerujussuarnit pisarineqarsinnaasut. Inuit aalisarunnaartut suliffeqarfinni allani maannakkorpiaq sulisussaaleqiffiusuni atorneqarsinnaassapput.

Taamaammat siunnersuisoqatigiinnit sakkortuumik kaammattuutigineqarpoq, Aalisarneq pillugu Ataatsimiititaliarsuup isumaliutissiissutini saqummiuppagu Naalakkersuisut tigussaasunik suliniuteqarnermikkut malitseqartitsissasut, isumaliutissiissut sapaatip akunnerani matumani kingusinnerusukkut saqqummiunneqassaaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER