aningaasaqarneq
Aningaasaqarnermut Siunnersuisoqatigiit: Ineriartorneq aamma aarlerinartoqartoq
Aningaasaqarnermut Siunnersuisoqatigiit nalunaarusiaata kingulliup ullumi saqqummiunneqartussap, ukiuni marlunni tulliuttuni 3,9 procentimik aamma 2,6 procentimik siuariartoqarnissaanik naatsorsuutigisaqarput. Kisianni siunnersuisoqatigiit arlalinnik aarlerisaaruteqarput.
Kalaallit aningaasaqarneranni siorna siuariarneq procentit arfineq-marluk missaanniipput, tamannalu ingammik aalisarluartoqarneranik pissuteqarpoq, raajartassiissutit amerlineqarnikuullutik aamma akit qaffasimmata.
Atuineruleriartorneq
- Peqatigisaanillu sanaartorneq aningaasaqarnikkut siuariartornermut ilapittuivoq. Inuit aningaasanik atuinerat aamma qaffakkiartorpoq. Ingerlatat annertusiartornerat suliffissaqartitsinermik patajaallisitsivoq, nalunaarusiap eqikkarneqarnerani tamanna allaqqavoq.
Inuit ilinniagartuut suliffissaaleqinngitsut aamma siunnersuisoqatigiit paasivaat, eqimattallu sinnerinut ajornerusumik isikkoqarpoq.
Aaqqissuussaanermik ajornartorsiutit aaqqinneqanngitsut
- Aningaasaqarnerup pitsaasumik ineriartornera pissutsinut immikkut ittunut tunngasuuvoq, taamaalillunilu aaqqissuussaanermik ajornartorsiutit aaqqinneqarsimanerannik imaluunniit nutaanik inuussutissarsiornikkut periarfissanik ineriartortitsisoqarsimaneranik ersiutaanani, siunnersuisoqatigiit aarlerisaarerpalaarlutik taama oqarput, tassani rubinisiorfiup ingerlanera maluginiaqquaat, kisianni nunap aningaasaqarneranut annerusumik malunnaataanani. Aammattaaq takornariaqarneq aalaakkaasuuvoq.
Aningaasaqarnermut Siunnersuisoqatigiit siulittaasoq, professor Torben M. Andersen siuttuliullugu, ineriartornermut mumisitsisinnaasunik tamatuma uparuaatippaat.
Akinut sunnertianeq annertooq
- Aalisarnermik pinngitsuuisinnaannginneq taamaalillunilu akit pisassanillu periarfissat ineriartornerannik sunnertianeq annertuvoq. Ukiuni kingulliunerusuni akit pisallu annertussusaat pitsaasumik ineriartorput. Oqaluttuarisaanermilu misilittakkat tamatuma sukkasuumik allanngorsinnaanera takutippaat, nalunaarusiami tamanna allaqqavoq.
- Massakkut mittarfinnut, takornariartitsinermi attuumasunut inissianillu sanaartornermut aningaasaliinissamut assigiinngitsunik pilersaaruteqartoqarpoq. Sulisinnaasullu tamangajavimmik sullimmata ingerlatanik taamaattunik pissutsit massakkutut itsillugit aallartitsinerit, aningaasarsiornerup sukkavallaamik ingerlalerneranik tamanna nassataqarsinnaavoq, tamatumalu akit akissarsiallu qaffakkiartupiluulernerat nassatarissavaa, siunnersuisoqatigiit taama ilimagisaqarput, unalu maluginiaqqeqquaat: ''aaqqissuussaanermik aaqqissuusseqqittoqannginnera aningaasaqarnikkut suli siuariartornerusinnaanermik sakkortuumik aporfissiivoq''.
Tusagassiortunik katersortitsineq
Aningaasaqarnermut Siunnersuisoqatigiit pingasunngornermi tusagassiortunik katersortitsisussaagaluarput, kisianni ullumikkumut sisamanngornermut nal. 14.00-mut kinguartinneqarpoq.
Uani ataani siunnersuisoqatigiit nalunaarusiaat aallaavigalugu Sermitsiaq.AG-p sapaatip-akunnerata ingerlanerani allaaserereersimasai atuarsinnaavatit:
''Inuusuttut ukioqatigiiaat arlallit annaassavagut''
Aningaasaqarnermut Siunnersuisoqatigiit mittarfissanut misissueqqissaarnerit amigaatigaat
Aningaasaqarnermut Siunnersuisoqatigiit aalisarnermut inatsimmut isorinnittut