Aningaasaqarnermut Siunnersuisoqatigiit aalisarnermut inatsimmut isorinnittut

Aningaasaqarnermut Siunnersuisoqatigiit nalunaarummi pingasunngorpat tusagassiortunik katersortitsinermi siunnersuisoqatigiit siulittaasuata, professorip Torben M. Andersenip, saqqummiussassaani atuarneqarsinnaavoq, ''inuussutissarsiorneq niuernerup ineriartorneranik, uumassusillit atugaannit aamma politikkikkut pilersinneqartumik nalornisinneqartoq''.

Kingunissaanik ersarissumi naliliisumik ujartuisut
Aalisarnermut inatsisissamut siunnersuut pillugu ima allaqqasoqarpoq:

- Siunnersuut annertoorujussuummat, kingunissaanik naliliinermik peqqissaartumik politikkikkut oqallinnermut tapiliussassamik saqqummiussisoqanngimmat naammanginanngilaq.

Allatut oqaatigalugu, inatsisissap kingunissaasa illersorneqarsinnaasumik nalilernissaannut politikerit tunngavissamik pissarsisimanngitsut, Aningaasaqarnermut Siunnersuisoqatigiit isumaqarput.

Malunnaatilimmik nalornisitsissasoq
- Siunnersuut saqqumminneqartoq arlalinnik tunngaveqartumik malunnaatilimmik nalornisitsissaaq. Siunnersuut naammassisaanngilaq, siunissami akuersissutit atorunnaarsinneqarnerinut aamma agguaateqqinneqarnissaannut malittarisassat ilisimaneqannginnerat pissutaalluni, nalunaarummi tamanna atuarneqarsinnaavoq, tassani uparuarneqarpoq, aalisarnermi aningaasaliinermut nalornisitsinermik pilersitsisoqassasoq, inuussutissarsiornermilu nutaat aallartinnissaannut ajornarnerulersitsissalluni.

Aalisarnermit nalit pilersinneqartut pitsaanerusumik agguarneqartarnissaannut kissaateqartoqartoq, Aningaasaqarnermut Siunnersuisoqatigiit malugaat.

- Imaani pisuussutit atorneqarnerisa nalingat inuiaqatigiinnut iluaqutaanissaat qulakkeerneqassappat, pisuussutit erniaannut akileraarusersuiarnerup tulluartuuvoq, siunnersuisoqatigiit allapput, ''inuiaqatigiinnut iluaqutaaffiginerpaanissaa qulakkeerniarlugu, pisuussutit erniaasa akileraarusersorneqarnerisa ilusaata aamma annertussusaata isumaliutiginissaa tulluarnerussasoq'' oqaatigaat.

Eqquiniaanertut ittoq
- Siunnersuut saqqumminneqartoq inunnut aalajangersimasunut isertitaqarnerulersitsissaaq, tassa akuersissutinik nutaanik agguaanneqartunik pissarsisunut, kisianni agguaasseqqinnermut politikki ersarinngitsorujussuussaaq aammalu kikkut taamatut periarfissinneqarnissaannut tunngatillugu eqquiniaatitsinertut issalluni. Tamatuma saniatigut akileraartarnikkut akitsuutitigullu iluanaarutit ikileriassapput, tamannalu inuiaqatigiit sinnerinut akileraartarnikkut akitsuutitigulluunniit, imaluunniit pisortani sipaarniartoqarneratigut kinguneqartitsissapput. Aammattaaq siunnersuut assigiinnginnermik annikinnerulersitsissanersoq ersarinngilaq, Aningaasaqarnermu siunnersuisoqatigiit naqissusiipput.

Inatsisissatut siunnersuut maanna tusarniaassutigineqarpoq, tusarniaanermullu akissutit piniarnermut aalisarnermut naalakkersuisoqarfimmut kingusinnerpaamik septembarip 18-anni nassiunneqareersimassapput. Inatsisissatut siunnersuut Inatsisartut ukiakkut ataatsimiinneranni ullormi kingullermi novembarip 16-anni oqaluuserisassanngortinneqarpoq.