aningaasaqarnermut inatsit 2018
Aningaasaqarnermut inatsissatut siunnersuummi sinneqartoornissaangaluaq tamaangaannalerunarpoq
2018-mut aningaasaqarnermut inatsisissatut siunnersuut saqqummiuteqqammiinnartoq isertitassatut ilimagineqartut unammillernartoqartinneri pissutaallutik ikilisarneqartariaqartut Aningaasaqarnermut Akileraartarnermullu Naalakkersuisoqarfiup nassuerutigaa. 8,6 mio. koruuninillu sinneqartoornissaangaluaq takorluugaannanngorsinnaavoq.
Pineqartoq tassaavoq qaleralik. Ukioq manna qaleralinnut akileraarutit 40 mio. koruunit isertitassatut naatsorsuutigineqarput, ukiulli tulliani isertitat 55 mio. koruuninut qaffariaateqarnissaat ilimagineqarluni.
Aalisarneq unammillerfiusoq
Taama amerlatigisunik takorluuinermi ukioq manna qaleralinniarnerup unammillernagaatsiarnera eqqarsaatigineqarsimanngilaq. Takuneqarsinnaalereerpormi aalisartut pisassiissutigineqarsimasut tamakkerlugit pisarinavianngikkaat, tamannalu sapaatit akunnerisa arlallit matuma siorna Sermitsiap oqaatigeersimavaa.
Ukioq manna 1 august tungaanut qaleralittarineqarsimasut ukiup siulianut piffissap taamaasineranut sanilliunnerini 5.500 tonsinik ikileriaateqarsimasut, Naatsorsueqqissaartarfiup kisitsisaataasa nutaat takutippaat.
Apeqqutaanginnalerporlu qalerallit aalisapilunneqarsimanersut. Ukiunimi arlalinngortuni qaleralittassiissutigineqartartut biologit innersuussutaat sinnerujussuarlugit pisassiisoqartarpoq.
2016-mi kisitsisit aallaavigalugit ilimasunneq
Naalakkersuisoqarfiup pisortaa Nikolai S. Christenseni Sermitsiaq.AG-mut akissuteqarnermini, ukioq kingulleq Namminersorlutik Oqartussat qaleralinnit isertitarisimasaat aallaavigalugit 2018-mut qaleralinnut isertitassatut naatsorsuutigineqartut, paasissutissiaraa.
- 2018-mut isertitassatut ilimagisat 2016-imi pisarineqartut akillu aallaavigineqarput, naalakkersuisoqarfimmi pisortaq paasissutissiivoq. Aningaasaqarnermullu inatsissatut siunnersuutip saqqummiunneqarneranit ullut pingasut qaangiutiinnartut isertitassatut ilimagineqartut aaqqinneqartariaqartut nassuerutigaa.
5 mio. koruuninut aaqqiineq
- Piffissami matumani qaleralinnit isertitassatut naatsorsuutit aaqqinneqartariaqartutut isikkoqarpoq, ukiummi affaata ingerlanerini 2016-imi kisitsisit sanilliunnerini 5 mio. koruuninik isertitat ikinnerupput, naalakkersuisoqarfimmi pisortaq Sermitsiaq.AG-mut paasissutissiivoq.
2017-imi qaleralinnut isertitassani 10 mio. koruunit annaasat aanguneqarsinnaaneri qularnartorujussuuvoq, aalisanermummi suliallit annersaasa pisassiissutigineqarsimasut tamakkerneqarsinnaanissaat ilimaginagu oqaatigisimavaat.
Aqqaluaq B. Egede iluarisimaarpoq
Aningaasaqarnermut Akileraartarnermullu , Aqqaluaq B. Egede, 2018-mut aningaasaqarnermut inatsisissaq saqqummiunnerani 8,6 mio. koruuninik sinneqartoorfiussasoq ataasinngormat iluarisimaaqaluni paasissutissiaraa.
Naalakkersuisoqarfiulli pisortaata Nikolai S. Christensenip paasissutissiaraa aningaasaqarnermut inatsissatut siunnersuummi isertitassatut aningaasartuutissatulli ilimagisat siusinnaarluni aalajangiunneqartartut.
Kingusinnerusukkut ilimagisat aaqqiivigineqassasut
- Ukiumoortumik aningaasaqarnermut inatsit suliarineqarnerani akuersissutigineqarneranilu, aalisakkanut raajanullu akileraarutit akitsuutillu isertitassatut ilimagisat Naalakkersuisut aaqqiivigissavaat. Tamanna aningaasaqarnermut inatsissatut siunnersuutip aappassaaneeerneqarnerani pinerusartoq, naalakkersuisoqarfiup pisortaa paasissutissiivoq.