aningaasaqarnermut inatsit

Aningaasaqarnermut inatsimmi amigartoornissaq siunnnersuutigaat

Naalakkersuisut 2015-imut aningaasaqarnermut inatsisissami 85 million koruunit pallillugit amigartoornissaq siunnersuutigaat, taarsiulluguli 2018-imi naatsorsuutit oqimaaqatigiilernissaat neriorsuutigalugu

Aningaasaqarnermut aatsitassanullu naalakkersuisoq, Demokraatineernersoq Anda Uldum

Aningaasaqarnermut aatsitassanullu naalakkersuisup, Demokraatineernersup Anda Uldumip, 2015-imut aningaasaqarnermut inatsisissaq qulequtserneqarsimasoq ‘Ataatsimoorluta qajaq makisissavarput’ tallimanngornermi saqqummiuppaa.

- Aningaasanut inatsisissatut siunnersuutip 2015-imoortup tunuliaqutigai aningaasaqarnikkut nalaatavut unamminartut – piffissamilu sivikitsuinnarmi sakkortusisimasut. Saqquminerpaarlu assersuutigiinnariarlara: Pituffik ukiumut millioninik marlunnik kisitsisitalinnik annaasaqarfigiumaarunaagarput. Unamminartut nukinginnartut allat nalaatavut tassaapput raajartassat ikilinerat innuttaasullu utoqqaat amerliartornerat. Tamanna isumaqarpoq akileraartarnermit isertitat ikinnerulernerat, inuiaqatitsinnullu utoqqarnut aningaasartuutit ikalinerat. Taamaammat iliuuseqarnissaq pisariaqarpoq – Naalakkersuisullu iliuuseqarnissamut piareeqqapput, taama aningaasaqarnermut aatsitassanullu naalakkersuisoq, Demokraatineersoq Anda Uldum oqariartuuteqarpoq.

Killiffik najoqqutaralugu aningaasaqarnermut inatsit
Naalakkersuisut 2015-imut aningaasaqarnermut inatsisissami 85 million koruunit pallillugit amigartoornissaq siunnersuutigaat, taarsiulluguli aamma 2018-imi naatsorsuutit oqimaaqatigiilernissaat neriorsuutigalugu.

- Tamanna tunuliaqutaralugu Naalakkersuisut aningaasanut inatsimmik sukangasumik saqqummersitsipput, aningaasaqarnitta inissisimaneranik ersersitsisumik. Aammali aningaasaqarnermut inatsisissatut siunnersuut pitsaasunik anguniagaqarpoq, siunnersuut ajornartorsiutip aaqqinnissaanut periarfissanik assigiinngitsorpassuarnik imaqarmat, Anda Uldum oqarpoq.

Taannalu ima nangippoq:

- Akerlia amiilaarnartuuvoq. Maannakkut iliuuseqanngikkutta suli akiligassaq annerusoq paarilissavarput. Tamannalu isumaqassaaq ukiuni tulliuttuni suli sipaarnerulertariaqarnermik, ajornerusumillu inuiaqatigiinni sanngiinnernut kinguneqarsinnaasumik. Tamannalu akuerineqarsinnaanngilaq. Taamaammat pisariaqarluinnarpoq maannakkut iliuuseqarnissarput.

Sipaarniartoqarnissaa siunnersuutigaat
2018-imi naatsorsuutit oqimaaqatigiilernissaat isumannaarniarlugu Naalakkersuisut sipaaruteqarnissaq ingerlatsinikkullu suliniutit nutaat siunnersuutigaat.

- 2018-ip tungaanut Namminersorlutik Oqartussani allaffissornikkut ingerlatsinikkullu ataatsimut ukiut tamaasa 50 million koruuninik sipaaruteqarfissanik nassaartassapput. Tulliullugulu sakkunik eqqussissaagut, pisortat aningaasaataannik aqutsilluarsinnaanerusunik. Assersuutaasinnaavoq missingersuutinut inatsimmik nutarterineq, Naalakkersuisut kommunillu aningaasartuutaannik killiliinermik nassataqartussaq, Uldum taama oqariartuuteqarpoq.

Kisianni Anda Uldummi malillugu aningaasaqarnermut inatsisissatut siunnersuut sipaaruteqarfissaannarnik saqqummiussinngilaq:

Assersuutigineqarsinnaavoq umiarsuakkut takornarianut akitsuutip annikillisinnera. Assersuut alla sanaartornermi aningaasaliinerit annertuumik qitiutinneqarnerat, uuma ataani suliffeqarfiit, inissiat, mittarfiillu. Taaneqartup kingulliup illoqarfinni sanasut suliassaat annertusissavaa.

2015-imut aningaasanut inatsisissatut siunnersuut tamaat linki talerpiatungaaniittoq toorlugu aasinnaavat

Powered by Labrador CMS