Angallanneq
Aningaasaqarnermut Ataatsimiititaliap paamaarneq utoqqatsissutigaa
Kiffartuussinissamut isumaqatigiissutit upernaarli naammassineqarsimasariaqaraluarput, ataatsimiititaliaq isumaqarpoq
Inatsisartut Aningaasaqarnermut Akileraartarnermullu Ataatsimiititaliaata attaveqarnermut naalakkersuisoq, Knud Kristiansen (A), kajumissaaruteqarfigaa.
Partiinit naalakkersuisoqatigiinnersut ataatsimiititaliamiittut kiffartuussinissamut isumaqatigiissutit nutaat ataatsimiinnermi akuerineranni, ataatsimiititaliap ingerlatseqatigiiffinnik isumaqatigiissuteqarfigineqarnerat aamma kingusissukkut pisimanera utoqqatsissutigaa.
Atuaruk: Ilaasut timmisartorlutillu umiarsuartassapput
Upernaakkut
Ataatsimiititaliap aamma siornatigut oqaatiginikuuaa, Naalakkersuisut isumaqatiginninniarnerit siusissukkut aallartittassagaat, taamaalillutik isumaqatigiissutit upernaakkut piareerneqartarniassammata.
- Tamanna angalatitsisunut aamma atuisunut pilersaarusiornissamut piffissamik annerusumik qulakkeerinnitsitsissaaq. Ataatsimiititaliap tamanna pisimanngimmat ajuusaarutigilluinnarpaa, ataatsimiititaliap aalajangiinerani tamanna atuarneqarsinnaavoq.
Atuaruk: Air Greenlandip atorfiit 45-t peertariaqarpai
Pimoorussinerusoq
Suliassat marluk kiffartuussinissamik isumaqatigiissutit siunissami isumaqatigiinniutigineqarnissaanni pimoorullugit sulissutigineqartariaqartut ataatsimiititaliaq isumaqarpoq.
- Tamatumani pineqarpoq suliassaqarfimmi unammillernissamut periarfissanik siuarsaanissaq aammalu suliassaqarfiit kiffartuussinissamik isumaqatigiissuteqarfiusussat aammalu niuernermik tunngaveqarluni ingerlatassat erseqqinnerusunngorlugit saqqummuinneqarnissaat, taamaliornikkut Kalaallit Nunaanni ilaasunik angallassineq ataqatigiinnerusunngorlugu ataatsimoornerusunngorlugulu ataatsimiititaliamit takuneqarsinnaaqqullugu, ataatsimiititaliami ilaasortat naqissusiipput.
Atuaruk: Najukkami qinigaq: Kiffartuussinissamut isumaqatigiissutit annertuumik ajornerulerput