Aningaasaqarnermut ataatsimiititaliap Naalakkersuisut akerlilersorpaat

Angallannermi kiffartuussinermut isumaqatigiissutit imarisaanut kikkut akisussaasuunersut oqaluuserineqaqqilerpoq.

Atuuffini annikillisaraa
Inatsisartut Aningaasaqarnermut Ataatsimiititaliaata, suliap aallartinnerani atuuffini annikillisarpaa.

Naalakkersuisut siulittaasuata Kim Kielsenip, Inatsisartunut ilaasortat sinaakkutissanik akuerseqataanerarlugit - aamma isumaqatigiissummi ajorseriartoqarnissaanik aarlerisaarisoqarsimasoq ersarissumik oqariartuutigineqarnerata kingorna, taamatut oqariartuuteqartoqarpoq.

Atuaruk: Kim Kielsen: Ajornerulertoqarnissaanik aarlerisaarinikuuvugut

Akerleriiffiusut
Isumaqatigiissutit nutaat imaatigut angallannermik aallutaqarnerulerniarmata akerleriiffiupput, ullumikkut qulimiguulimmik angallassineq atugaaneruvoq. Kiisalu ilaasut kiffartuussinermut isumaqatigiissutit angallassiffigiisaanni kinguaattoorneq pissutigalugu aallanngitsuussagaluarunik, unnuinermut nerisaqarnermullu qulakkeerneqarunnaartussaapput.

Atuaruk: Disko Linemi piareersartut

Naalakkersuisut pisuusut
Aningaasaqarnermut akileraarnermullu ataatsimiititaliap Naalakkersuisut suliami atuuffiat tikkuartorpaa.

- Taamaalilluni 2016-imi aningaasanut inatsimmik siunnersuuteqartutut kiffartuussinissamut isumaqatigiissutinut sinaakkutitut atugassarititaasussat Naalakkersuisut namminneq siunnersuutigimmatigit ataatsimiititaliamit naqissuserneqassaaq.

- Naalakkersuisullu taamaalillutik Aningaasaqarnermut Akileraartarnermullu Ataatsimiititaliamut qinnuteqaamminni allapput kiffartuussinissamut isumaqatigiissutit 2016-imi aningaasanut inatsimmi, ilaasunik angallassinermut tapiissutinut tunngasumut, oqaasertaliussami killissaritinneqartut iluini neqeroorutigineqarlutillu isumaqatigiinniutigineqassasut, ataatsimiititaliaq erseqqissaavoq.

Taamaattumillu Aningaasaqarnermut Ataatsimiititaliap apriilimi aningaasat 121 millionit koruunissaannik sinaakkusiisimaneranik tusagassiorfinnut oqarneq pissusiviusunut akerliunerarpaat.

Aningaasaleeqqinnerit
Tassunga atatillugu ataatsimiititaliap tikkuarpaa, piffissami isumaqatigiinniarnissamut piginnaatitsissutip ataatsimiititaliamit akuerineqarnerani aningaasaliissutinik annertunerusunik pisariaqartitsisoqarsinnaaneranik ataatsimiititaliaq sukkulluunniit saqqummiivigineqanngitsoq.

- Taamaattumik ataatsimiititaliap takusinnaasimanngilaa sooq sinaakkutitut atugassarititaasut attatiinnarneqassannginnersut. Meeqqanut soraarnerussutisialinnullu akikillisaassuteqarnissap qulakkeerneqarnissaanut qaf­faanissaq Naalakkersuisut taamaallaat qinnutigaat, tamannalu ataatsimiititaliamit akue­rineqarpoq. Tamannalu kingusinnerusukkut pivoq.

Atuaruk: Knud Kristiansen: Isumaqatigiissutini periarfissanik amerlanernik ujaasivugut

Kiffartuussineq allanngunngitsoq
Ataatsimiititaliap aamma tikkuarpaa, isumaqatigiinniarnissamut piginnaatinneqarnissamik Naalakkersuisut qinnuteqaamminni ataatsimiititaliamut ima paasissutissiisut erseqqissarneqarpoq:

”Kiffartuussinissamut isumaqatigiissutit tamarmik angallannermi suliassat nunallu immikkoortui, aammalu sullissinerup qaffasissusia akulikissuserlu maanna atorneqartut tunngavigalugit neqerooruteqartitsivigineqassapput.”

Piumasaqarneq
Suliap immikkoortuata aappaani - Naalakkersuisut kiffartuussinermut isumaqatigiissutinut missingiut tusarniarneqarneranik nassiussineranni - ataatsimiititaliaq taamaallaat apeqquteqarnissamut aamma Naalakkersuisunut kaammattuuteqarnissamut taamaallaat periarfissaqartoq tikkuarneqarpoq.

Aatsaat taamaalinerani ajorseriaateqartoqarnissaa ataatsimiititaliamit maluginiarneqarpoq taakkulu kiffartuussinermi allannguinertut Naalakkersuisunit taaneqarput, ataatsimiititaliami ilaasortat erseqqissaapput.