Aningaasaqarnermut Ataatsimiititaliap akileraarutitigut nutaamik ilanngaasiisarnissaq unitsikkaa

Sulisartut aappaagu sulinermikkut akileraarutitigut iluanaaruteqarnissartik naatsorsuutigissanngilaat. Aningaasaqarnermummi Ataatsimiititaliaq isumaqatigiittoq aalajangersimavoq, suliffeqarnermi ilanngaatissaq Naalakkersuisut saqqummiussaat taamatut isikkoqartillugu akueriniarnagu.

Naalakkersuisut aappaagumiit atuutilersumik suliffeqarnermi ilanngaasiisalernissaq pillugu suliami itigartinneqarput.

Sunniutissaa ingasaallugu saqqummiunneqarsimasoq

Aningaasaqarnermut Ataatsimiititaliaq – Aningaasaqarnermut Siunnersuisoqatigiinni siulittaasoq Torben M. Andersen assigalugu – isumaqarpoq, Aningaasaqarnermut Naalakkersuisoqarfiup naliliisimaneratut ukiumut ataasiaannarluni tunniussisarnikkut suliffeqarnermi ilanngaat suliffissaqartitsiniarnerup siuarsarneqarneranut sunniuteqarnavianngitsoq.

Naalakkersuisut inatsisissatut siunnersuutaat naapertorlugu, sulinermi ajunngitsorsiassaq ukiup aningaasarsiorfiusup tulliani aatsaat tunniunneqartassaaq.

Iluanaarutissat qaammatikkaartumik tunniunneqartassasut

Aningaasaqarnermut Ataatsimiititaliap piumasaraa, sulisartup aningaasarsitinneqarnerani ilanngaatitigut iluanaarutissaq tunniunneqartartussanngorlugu aaqqissuussisoqassasoq.

- Siunertamut naapertuussorinarsinnaavoq … sulinermut ilanngaammut tunngasut nalunaarutikkut kingusinnerusukkut atuutilersinneqarnissaat, taamaaliornikkut ilanngaatip qaammatikkaartumik atugassiissutigineqartarnissaata periarfissinneqarnissaa siunertaralugu qarasaasiakkut aaqqissuussinernik il.il. pisariaqartumik naleqqussaanissamik qulakkeerinninnissaminnut Naalakkersuisut periarfissinneqassapput, taamaaliornikkullu sunniutissat siunertarineqartut anguneqarsinnaanissaat periarfissaqarnerulersinneqassalluni, Aningaasaqarnermut Ataatsimiititaliap isumaliutissiissutaani, inatsisissatut siunnersuutip siullermeerlugu suliarineqarata kingorna saqqummiunneqartumi taamatut allassimasoqarpoq.

Qaqugu atuutsinneqalissanersoq siumoortumik oqaatigineqarsinnaanngilaq

Akileraartarnermut Aqutsisoqarfiup ataatsimiititaliap piumasaqaataanik qaqugu suliaqarsinnaanera imaaliinnaq oqaatigineqarsinnaanngilaq.

Aningaasaqarnermut Naalakkersuisoqarfimmit ilisimatitsissutigineqarpoq, Akileraartarnermut Aqutsisoqarfiup it-kkut atortorissaarutaanik naleqqussaanissaq qanoq akeqassanersoq aamma atortorissaarutip ajunngitsumik ingerlalernissaanut piffissaq qanoq sivisutigisumik ingerlassanersoq ilisimaneqanngitsoq.

Taamaaliortoqassappat sunik suliaqartoqarniarnersoq erseqqissaaffigineqartariaqarpoq, taamaalippammi aatsaat suliffeqarfiit it-mik ineriartortitsisartut arlaat neqerooruteqarsinnaammat.

Nassuiaatigineqarpoq, akileraarusersueriaatsimi maanna atuuttumi aningaasarsiat suminngaanneernersut isiginiarneqarneq ajornerat. Imatut paasillugu, aningaasarsiat A-t – akileraarutit peereerlugt aningaasarsiat – sumit aningaasarsiaanersut Akileraartarnermut Aqutsisoqarfiup immaqalu sulisitsisut atortorissaarutaasigut immikkoortinneqarsinnaasannginnerat.

Assersuutigalugu siusinaartumik pensionisialik, A-nik aningaasarsisssaguni sulinermi ilanngaammik iluaquteqarnavianngilaq.

Inatsisissatut siunnersuut aappassaanik suliarineqassaaq tallimanngornermi oktobarip 18-iani.

Powered by Labrador CMS