Inatsisartut
Aningaasaqarneq pillugu Demokraatit Aqqaluaq B. Egede sallunerarpaat
Illuatungiliuttut aamma Naalakkersuisut akornanni pisuuteqattaanneq
Naalakkersuisoqatigiissimasut Inuit Ataqatigiit aamma Demokraatit akornanni, partiit marluullutik 2009-mi 2013-imut Naalakkersuisuni siuttuunerisa kingorna, ukiuni arlalinni nipi inussiarniippaluttarpoq.
Maannalu aamma aningaasanut inatsimmut akuerineqaqqammertumut, ukiuni tulliuttuni amigartoorutit amerlineqarnerannut atatillugu imminnut pisuuteqattaakkamik taamaattoqarpoq.
Aningaasammi?
Amigartoorutit ukiuni sisamani tulliuttuni 145 millionit koruuniusussat, Naalakkersuisut qanoq ilillutik aningaasartalerniarneraat Demokraatit apeqqutigaat. Tamanna 144 millionit koruuninik qaffariarnerummat.
Tamanna aningaasaqarnermut naalakkersuisup, Aqqaluaq B. Egedep (IA), akissuteqarneranik kinguneqarpoq, KNR ilisimatitsivoq. Naalakkersuisuusimasut - Demokratit peqataaffigisaat - kiffartuussinermut isumaqatigiissutit iluamik suliarineqarsimagaluarpata, nammineq aningaasarpassuarnik sipaarsimasinnaagaluartut.
Atuaruk: Kiffartuussinermut isumaqatigiissutini pitsanngoriaatit sisamat
Eqqunngitsumik oqaluttoq
Taamatulli oqaaseqarneq Demokraatit siulittaasuannit, Randi Vestergaard Evaldsenimit, IA-p aningaasaqarnermut naalakkersuisuutitaanik toqqaannartumik salluliornertut pisuutitsissutigineqarpoq.
- Pakatsinaqaaq innuttaasunut sallu qanermioralugu oqaluttoqarsinnaammat. Neriuppunga Aqqaluaq B. Egedep oqaatsini qissaarutigisimassagai.
Atuaruk: Aningaasanut inatsit piareerpoq
- Demokraatini akuerisinnaanngilluinnarparput allannguutissatut siunnersuutini sussaanngitsut uangutsinnut tutsinniarsarimmagit. Kialluunniit takusinnaavaa eqqunngitsoq. Demokraatini Naalakkersuisut kaammattussavarput Aningaasaqarnermut Naalakkersuisuni akisussaassuseqanngitsoq inisseqqullugu ileqqorissaarnermullu ilinniartilaarlugu, Randi Vestergaard Evaldsen tusagassiuutinut nalunaarummi oqarpoq.
Atuaruk: Demokraatit amigartoorneq quarsaarutigaat