Aningaasaqarneq imminut napatittoq ungasiluallak

Allannguutissatut siunnersuutit 175-t - 145 mio. koruuninik ukiuni sisamani tulliuttuni nalillit. Tamanna aningaasaqarnermut akileraartarnermullu ataatsimiititaliap nuannaarutiginngilaa.

Atuaruk: Oqimaaqatigiisitsineq 145 millioninik amigartoorummik taarserneqartoq

Aningaasaqarneq patajaatsoq qulangiinnarneqarpoq

Kalaallit Nunaana aningaasaqarnikkut imminut napatissinnaanissaa suli ungasittoq ataatsimiititaliap nalilerpaa.

- Pingajussaaneerinninnissamut allannguutissatut siunnersuutit saqqummiunneqartut naapertorlugit attassisinnaanissamik pilersaarutit aammalu aningaasaqarnikkut imminut napatittumik ingerlajartuaarnissaq maannamut kinguartikkallarneqartutut isikkoqarput, ataatsimiititaliap ilassutitut isumiliutissiissutiminni ilaatigut allappoq.

Atuaruk: Kiffartuussinermut isumaqatigiissummut 22 millionit saniatigut aningaasaliissutaasut

Oqimaaqatigiisitsineq sussaarneqarpoq

Ukiuni sisamani tulliuttuni missingersuutit oqamaaqatigiisinnissaannut piumasaqaat naapertorneqanngitsoq ataatsimiititaliap isornartorsiorpaa.

- Ataatsimiititaliap isumaa malillugu ukiut sisamat iluanni oqimaaqatigiittumik ingerlatsinissamik piumasaqaat aningaasaqarnikkut imminut napatittumik ingerlajartuaarnissami assut pingaarutilittut ilaavoq.

Atuaruk: Demokraatit amigartoorneq quarsaarutigaat

Akiligassaq allanut ingerlateqqinneqarpoq

Aningaasaqarnermut siunnersoqatigiit aningaasanut inatsimmut siunnersuut pillugu mianersoqqusereertut aningaasaqarnermut akileraartarnermullu ataatsimiititaliami ilaasortat Naalakkersuisunut eqqaasitsissutigaat.

Naalakkersuisullu qinersisoqareernerani taarserpata akiligassaq taakku suliarisaqalissagaat erseqqissarlugu.

- Annertuumik amigartooruteqarneq qinigaaffimmi matumani taamaallaat pinnani aammali qinigaaffimmi tullermi aggersumi aningaasaqarnikkut siunissami anguniakkanut annertuumik unammillerfiusussaassasoq ataatsimiititaliaq isumaqarpoq, isumaliutissiissummi allapput.

Atuaruk: Aningaasanut inatsit piareerpoq

Attassisinnaanermut siuariartornermullu pilersaarut

Aningaasartuutit isertitallut oqimaaqatigiissarneqassasut attassisinnaanermut siuariartornermullu pilersaarut naalakkersuisuusimasup upernaaq saqqummiukkamiuk oqariartuutigaa.

Aningaasanullu inatsit amerlanerussuteqartunit akuerineqartoq oqariartuummut naapertuutinngitsoq ataatsimiititaliaq isumaqarpoq.

- Attassisinnaanermut siuariartornermullu pilersaarut aningaasaqarnikkut ingerlatsineq pillugu nalunaarutip ilaatut Naalakkersuisunit saqqummiunneqartoq ataatsimiititaliamit Naalakkersuisunut eqqumaffigeqquneqassaaq.

Naalakkersuisut: Aningaasartuutit pisariaqartut

Aningaasaliinerup saniatigut aningaasaleeqqiinneq pisariaqartoq aningaasaqarnermut naalakkersuisoq Aqqaluaq B. Egede (IA) isumaqarpoq.
- Aningaasartuutaanerusut inuiaqatigiinni ungasissumik isigisumik isumaginninnermut peqqinnissaqarfimmullu tunngasumik ataqatigiinnerunissamik ineriartortitsinissamillu pisariaqartitsinermik politikikkut pisariaqartitsisoqarneranut ersiutaasutut oqaatigineqartariaqarput, akissuteqaammini allappoq.

Sukaterisoqassasoq neriorsuutigaa

Aningaasaqarnermut inatsisissap tullia suliarineqalerpat sukaterisoqassasoq nassuerutigaa.
- Ukiut sisamat ingerlaneranni killilimmik amigartoorfiusumik missingersuusiortoqarnera Naalakkersuisut illersorneqarsinnaasutut isigaat, akissummini allappoq
Isumaliutissiissummi taakkartorneqartut isornartorsiuisoqaraluartorlu ataatsimiititaliami amerlanerussuteqartut, Inuit Ataqatigiit Siumullu, aningaasanut inatsisissaq akuersissutigaat. Demokraatit akuersinngitsut.