Aningaasaqarneq 2020-mi ima ingerlalluartigaaq

Nunatsinni aningaasaqarneq aniguivoq, 2020-milu annikitsumik siuariarluni, akerlianik nunat avannarliit coronap nunarsuaq tamakkerlugu tuniluunnerani aningaasaqarnerat sakkortuumik sunnerneqarpoq.

Nalinginnaasumik 0,4 procentinik siuariarneq annertuumik qiimmatsaatigineqarneq ajorpoq, kisianni Kalaallit Nunaata siuariarnera Nunanit Avannarlernit 2020-mi malunnaatilimmik pitsaaneruvoq.

Tassani nunat sinneri coronap nunarsuaq tamakkerlugu tuniluunnera pissutigalugu aningaasaqarnikkut ingerlanerliorput. Kisianni maani Nunatsinni BNP qaffariarpoq, siullermeerlunilu 20 milliardit koruunit anguai. Naatsorsueqqissaartarfimmit naatsorsukkat nutaat tamanna takutippaat.

BNP ukiup ataatsip ingerlanerani nunani tunisassiornernut naatsorsuineruvoq, Naatsorsueqqissaartarfiullu takussutissaq ataaniittoq suliarisimavaat, tassani Kalaallit Nunaanni ineriartorneq kiisalu nunani avannarlerni ineriartorneq takuneqarsinnaapput:

2020-mi qaffariarneq inuussutissarsiorfiit arlallit siuariarnerannik pissuteqarpoq, annermik aalisarneq, tunisassiorneq kiisalu illuliornikkut sanaartornikkullu ingerlatsiviit.

- Ingerlatsiviit aalisarneq tunisassiornerlu raajanik qaleralinnillu avam­mut tunisaqarnerat annertuseriarpoq naak kilomut akit apparaluartut taavalu nualluummik covid-19-imik nunarsuarmi nappaalasoqaraluartoq, naatsorsueqqissaartarfik allappoq.

Sanaartorneq siuariarfiunerpaasoq

Coronap nunarsuaq tamakkerlugu tuniluunnera inuussutissarsiorfinnut arlalinnut ajoqusiivoq. Ingammik assartuinermut kiisalu akunnittarfinnut neriniartarfinnullu.

Tassa inuussutissarsiorfinni taakkunani naleqarneru­lersitsineq 18,3 procentinik taavalu 45,5 procentinik apparput.

Naleqarnerulersitsineq inuussutissarsiorfimmi tunisassiornermut takussutissaavoq, illuliornikkut sanaartornikkullu inuussutissarsiorfiit siuariarnerpaapput:

- Ukiup siuliani akiusimasut aallaavigalugit naatsorsuinermi ingerlatsiveqarfiup naleqarnerulersitsinera 2.045 mio. kr.-inut qaffappoq, uki­up siuliani 1.901 mio. kr.-iusimalluni. Qaffariaat 143 mio. kr.-iuvoq imaluun­niit 7,5 pct, Naatsorsueqqissaartarfik allappoq.

Tamatuma saniatigut BNP siullermeerluni 20 milliardit koruunit pallippai, tamannalu assimi ataani takuneqarsinnaavoq.

BNP akiusimasunit kisitat akit qaffakkiartornerat peereerlugu ineriartorne­risa kisitsisitaat aamma aajuku, taakku ukiut assigiinngitsut sanilliunnissaannut naleqqunnerulersitsipput:

Powered by Labrador CMS