Aningaasanut inatsit: Soraarnerit sulinerminni annerusumik iluanaaruteqalissapput
Soraarnerit sulilersinnaanerat akilersinnaanerusariaqarpoq. Pensionisianut sunniuteqanngitsumik soraarnertut qanoq amerlatigisunik aningaasarsiorsinnaanermut killigititaq iluarsineqassaaq.
Ullumikkut isertitat qaffakkiartortillugit soraarnerussutisiat ikiliartortinneqartarput. Soraarnertut sulinermi iluanaarutip killeqarneranik tamanna kinguneqartarpoq. Tamanna allanngortinneqassaaq, partiit 2019-imut aningaasanut inatsimmik isumaqatigiissuteqartut tamanna aalajangiuppaat.
- Utoqqalinermi pensionisiallit suliffeqarfinniitiinnarnissaannut piumassuseqalersinniarlugit aningaasatigut qulakkeerinniffiginissaat anguniarlugu eqqarsaatigineqarpoq aningaasarsiarisinnaasaannut killeritinneqartup 2020-mit qaffaaffiginissaa, taamaaliornikkullu ilassutitut pensionisianut tunngatillugu nammineq aningaasarsiat qaffakkiartorneranni qanoq ilineratigut ikilisaasoqarnissaanut killissaq allanngortillugu, aningaasanut inatsimmi isumaqatigiissutigineqartumi tamanna allaqqavoq.
Utoqqaat oqaaseqartartuat
Politikkikkut oqallinnerit aallartinnissaat partiit isumaqatigiissutigaat, 2020-mi piviusunngortinneqarniassammata. Utoqqalinermi pensionisiallit akornanni suliffeqarfinnut attuumassuteqarnerulernerit ataatsimut isigalugu inuiaqatigiinnut tamanut atugarissaarnerulernermik kiisalu innuttaasut taakkua suli sulisinnaassusillit aningaasaqarniarnikkut ingerlallualernerannik iluaqutaasussasut oqaatigineqarpoq.
Pisariaqartumik inatsisissatut tunngavissaq 2019-imi pilersinneqarsinnaappat, utoqqaat oqaaseqartartuannik 2020-mi aaqqiissuteqarnissamik pilersaaruteqartoqartoq aamma saqqummiunneqarpoq.