Aningaasanut inatsit: Inuit innarluutillit pillugit suliniutissat ersarissut Tiliup amigaatigai

Tiliumi paasissutissanik ilisimasanillu katersinerit takutippaat inuit innarluuteqartut pisariaqartitaminnik pisinnaatitaaffimminnillu ikiorneqarnissamik pinngitsoortartut.

Inuit innarluuteqartut inatsisitigut illersugaanerat ulorianartorsiorujussuarpoq, Tilioq allappoq iliuuseqartoqarnissaanillu noqqaassuteqarluni.

- Kommunit pisortallu suliffeqarfiutaat allat pillugit arlaleriarluni nalunaaruteqartoqartaraluartoq qisuariartoqarneq ajornera pillugu Tiliumit suliat annertuumik ernumanartutut isigaavut. Ataqatigiissaarineq, akisussaaffiit akimorlugit iliuuseqarneq nutaaliornerlu pisariaqartinneqarput, Tilioq tusagassiorfinnut nalunaaruteqarluni allappoq.

Tiliumit erseqqissarneqarpoq sulianut tunngatillugu saaffiginnittut ilaqutaallu ataqatigiissaarinernik suliaqartariaqartut, ikiuutilli pineqarnissaat qulakkeerneqarsinnaasanngitsoq.

Akisugaatsialersinnaasoq

Inuit innarluutillit pillugit oqaaseqartartoq Anja Hynne Nielsen Naalakkersuisunik arlalinnik ataatsimeeqateqarsimavoq, soorlu Aqqaluaq B. Egede (IA), Jess Svane (S) aamma Erik Jensen (S) nunattalu FN-ip Inuit innarluuteqartut pillugit isumaqatigiissutaannik malinninnissaanut iliuuseqaqqusisimalluni.

Taassuma erseqqissarpaa inuit innarluutillit pillugit iliuusissatut pilersaarut suliarineqalereeraluartoq, taamaattoq aningaasanut inatsimmut 2024-moortumut, tallimanngornermi akuersissutigineqartussatut naatsorsuutigineqartumut, aningaasartaliussat inissinneqarsimasutut takusinnaanagit.

- Amigartumik tapersersorneqarneq imaluunniit ikiorserneqarneq, immikkoortitaaneq, inuppalaanngitsumik nikaginnittumillu iliuuseqarfigineqarneq, atornerluineq persuttaanerlu – tamakkua tamaasa pillugit arlalinnik nappaatinik, atornerluinernik aamma imminut toqunnermik kinguneqartarnerat ilisimavarput, tamanna aamma qanigisaasunut atuuppoq. Piffissap ingerlanerani pisortat aningaasartuutaannik annertusisitsisarput, Tilioq allappoq.

Sammineqarpallaarsimanngitsoq

Aningaasaqarnermut akileraartarnermullu Naalakkersuisoq, Erik Jensen (S) Tiliup tusagassiorfinnut nalunaarutaani nassueruteqarpoq inuit innarluuteqartut pillugit suliniutit sammineqarpiarsimannginnerarlugit.

Meeqqanut, inuusuttunut, ilinniartitaanermut, kultureqarnermut, timersornermut ilagiinnullu Naalakkersuisup, Aqqaluaq B. Egedep (IA), tusagassiorfinnut nalunaarummi erseqqissarpaa inuit innarluuteqartut atugaat pitsanngorsaniarlugit sulisoqassasoq.

- Isumaqatigiissutigaarput iliuuseqartoqartariaqartoq aammalu inuit innarluuteqartut susassaqarfianni aaqqissuussaanermi annertuumik unammillernartoqarmat. Naalakkersuisoq Tilioq suleqatigalugu, innarluuteqarnermik susassaqarfiup nukittorsarnissaannut kivinnissaannullu pisariaqartippaa, taamaasilluni inuit innarluuteqartut inuuniarnermikkut siunissaat pitsaaneroqqulllugu, Aqqaluaq B. Egede oqarpoq.

Politikkikkut sulisoqartariaqartoq - alloriarnerit allaanerusariaqarput

Tiliumi kisitsisit takutippaat Kalaallit Nunaanni innuttaasut tallimararterutaa annerusumik minnerusumilluunniit innarluuteqartut.

Anja Hynne Nielsenip malugisinnaanerarpaa inuit innarluutillit atugaasa pitsanngorsarnissaanut politikkikkut suleqataarusussuseqartoqartoq.

- Taamaattorli suli neriuutigingaarparput siunertaq tamanna ukioq manna pilerumaartoq, imaluunniit Kalaallit Nunaat allatut isiginnittaaseqalerluni tassalu inuit tamarmik nukittut, naligiittut assigiimmillu pisinnaatitaaffeqarnerannik isigilerlugit takussutissiisoqarnissaa. Taamaallaat taamaaliornikkut nammineq nammatamik aningaasaateqartoqarsinnaavoq aammalu inuiaqatigiittut ingerlasoqarsinnaavoq, Anja Hynne Nielsen oqarpoq.

Inuit innarluutillit pillugit oqaaseqartartoq, iliuusissatut pilersaarut suliniutillu pillugit qanimut oqaloqateqarnissamut qaaqquneqarsimavoq.

Sermitsiaq.AG-p inuit innarluutillit pillugit suliniutinut tunngatillugu Naalakkersuisut itisiliitikkumallugit saaffigai.